ފަލަސްތީނުގެ ރައްޔިތުންނަށް އެހީވުމަށް ރާއްޖޭގައި ކުރިއަށް ގެންދާ ފަންޑް ރައިޒިން ހަރަކާތްތަކުގެ ތެރެއިން މޯލްޑިވްސް ރެޑް ކްރެސެންޓްގެ ފަރާތުން ކުރިއަށް ގެންދާ ހަރަކާތްތަކާ ގުޅިގެން އެ ޖަމާއަތަށް އެއްބާރުލުން ނުދޭން އައްޑޫގެ މަޝްހޫރު ދީނީ އިލްމުވެރިޔާ ޝެއިހް މުހައްމަދު އަނީލް ގޮވާލައްވައިފި އެވެ.
ނޫރުލް އިސްލާމް ޖަމިއްޔާގެ ރައީސްގެ މަގާމުގައި ވެސް ހުންނެވި އަނީލް އޭނާގެ ފޭސްބުކް ސްޓެޓަސްގައި ވިދާޅުވީ ރެޑް ކްރެސެންޓުން ކުރާ ކަމަކީ ޢައްޒާގައި އަނިޔާ ލިބެމުންދާ މުސްލިމުންނަށް ފުރައްސާރަ ކުރުން ކަމަށެވެ.
"ޢައްޒާގައި އަނިޔާ ލިބެމުންދާ މުސްލިމުންނަށް ފުރައްސާރަކޮށް، ބޮޑު ބެރު ޖަހައި ފުރައްސާރަކޮށްފައިވާތީ ދިވެހި ރެޑް ކްރެސެންޓަށް އެއްބާރުލުން ނުދިނުމަށް ގޮވާލަން،" ޝެއިހް އަނީލް ލިއުއްވާފައިވެ އެވެ.
ރެޑް ކްރެސެންޓުން ފަންޑް ހޯދަން ކުރިއަށް ގެންދާ ހަރަކާތް މި މަހުގެ 25 އާ ހަމައަށް ކުރިއަށް ގެންދާ ގޮތަށް ހަމަޖެހިފައިވެ އެވެ.
އެ ޖަމާއަތަށް އަނީލް ފާޑު ވިދާޅުވި އިރު، ނޫރުލް އިސްލާމާއި ޕާލް ޖަމިއްޔާ ގުޅިގެން އައްޑޫގައި ހިންގި ހަރަކާތްތަކުން މިހާތަނަށް 200،000 ރ. އަށް ވުރެ ގިނަ ފައިސާ ވަނީ ޢައްޒާ ފަންޑަށް ހޯދައި ދީފަ އެވެ.
އެ ފައިސާ މައިގަނޑު ގޮތެއްގައި އެއްކޮށްފައި ވަނީ ރަށްރަށުގެ މަގުތަކުގައި ފަންޑް ފޮށި ބަހައްޓައިގެން އާންމުންނަށް ފައިސާ ހަދިޔާ ކުރެވޭ ގޮތަށް ކުރިއަށް ގެންދިޔަ ހަރަކާތްތަކުންނެވެ.