އައްޑޫ ސިޓީ ހިތަދޫގެ ޝަމްސުއްދީން ބޮޑުފަނޑިޔާރު ތަކުރުފާނު މަގުގެ ބައެއްގައި ޖަހާފައި ހުރި ބޮކިތައް އަނދައިފިއެވެ.
ހިތަދޫގެ ކުރީގެ ޕޮލިސް ޓްރެއިނިންގ ސްކޫލް ކައިރިން ފެށިގެން އެޕޯލޯ ސްޓޯރ އާ ހިސާބަށް ހުރި އެއްވެސް ލައިޓެއްގެ އަލިކަމެއް ފާޅުވާން ނުހުންނަތާ ހަފްތާއެއް ވަނީއެވެ.
މަގަކީ ދުވާލެކޭ އެއްފަދައިން ރޭގަނޑުވެސް ގިނަ ރައްޔިތުން ބޭނުން ކުރަމުން އަންނަ މަގަކަށް ވީއިރު މަގުގައި އަލިކަމެއް ނެތި ހިނގާ މީހުން ހިނގައި، ދުއްވާ މީހުން ދުއްވަނީ ނުހަނު ދަތި އުނދަގޫ ކަމާ، ބިރުވެރިކަން މަތީގައެވެ.
ފަހުގެ މާޒީއެއްގައި އައްޑޫ ސިޓީގެ މިމަގުގައި ދުއްވާފައި ދިޔަ ކާރެއް ހިނގާފައި ދިޔަ ކުއްޖެއް ގައިގައި ޖެހި އެކްސިޑެންޓްވެ، ކުއްޖާގެ ފުރާނަ ވަނީ ދެމިއޮތުމުގެ އާލަމަށް ދަތުރުކޮށްފައެވެ.
މިފަދަ ހިތާމަވެރި ހާދިސާއެއް ހިނގުމުން ހުރިހާ އެންމެން ތެދުވެ، އެއްބަޔަކު އަނެއްބަޔަކަށް އިނގިލި ދިއްކުރަން ޖެހުމުގެ ކުރިން މިކަން ހައްލު ކުރެވިދާނެތޯ އެވެ؟