ރާއްޖެ އަށް ކާޑުގެ ބާވަތްތައް އެތެރެ ކުރުމުގެ ހުއްދަ އޮތް ހަމައެކަނި ކުންފުނި އެސްޓީއޯ އަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންމަބަރު އަދި ކުރީގެ ބްރިގޭޑިއާ ޖެނެރެލް އިބްރާހީމްދީދީ ވަރުގަދަ ބަހުގެ ހަމަލާތަކެއް ފޮނުވައިފި އެވެ.
ސަބްސިޑީ ކަނޑާލައި، ކާޑުގެ އަލަށް ގެނައި ބަދަލާ ގުޅިގެން ރައްޔިތުންގެ މަޖިލީހަށް އިއްޔެ ހުށަހެޅި މައްސަލާގައި ބަހުސް ކުރައްވަމުން އިބްރާހީމްދީ ވިދާޅުވީ އެސްޓީއޯ އަށް ނުއަގުގައި އައްޑޫން ބިންތަކެއް ދޫކޮށްފައިވާ އެބަހުރި ކަމަށެވެ.
އެހެންވެ މިކަން މިހެން ހުރުމާ އެކު އެސްޓީއޯ އައްޑޫގެ ރައްޔިތުންނަށް މި ދަނޑިވަޅުގައި އެހީތެރިކަން ފޯރުކޮށް ދޭން ޖެހޭ ކަމަށް ވިދާޅުވި އެވެ.
ކާޑުގެ ސަބްސިޑީ ކަނޑާލުމުން މިހާރު، ކާޑުގެ ބާވަތްތައް އެންމެ އަގު ބޮޑީ އައްޑޫގަ އެވެ.
"އެސްޓީއޯ އަށް އެބަހުރި އައްޑޫގެ އެކިއެކި ބިންތައް ކުއްޔަށް ނުއަގުގައި ދޫކޮށްފައި. ބޮޑެތި ތެޔޮ ތާނގީތައް ހަދާފައި އެބަހުރި. ބޮޑެތި ގުދަންތައް ހަދާފައި އެބަހުރި. ހިލަ އާއި ހިލަވެލި މާލެ އާ އެއް އަގެއްގައި އައްޑޫގެ ރައްޔިތުންނަށް ފޯރުކޮށް ދިނުމަށް،" އިބްރާހީމްދީ ވިދާޅުވި އެވެ. "ހިތަދޫގެ އެއޮތް ބަނދަރު ބޭނުންކޮށްގެން ހަނޑުލާއި ހަކުރާއި ފުށާއި ތެލުގެ ހިދުމަތް އަޅުގަނޑު ދެކޭ ގޮތުގައި މިއަދު އެސްޓީއޯ އިން އެބަ ޖެހޭ މާލެ އާ އެއް އަގެއްގައި އައްޑޫ ރައްޔިތުންނަށް ފޯރުކޮށް ދޭން."
އޭނާ ވިދާޅުވީ އެއީ މިއަދުން މިއަދަށް ވެސް އެ ކުންފުނިން ރައްޔިތުންނަށް ކޮށް ދޭން ޖެހޭ ކަމެއް ކަމަށެެވެ.
އިބްރާހީމްދީ ވިދާޅުވީ ކާޑާއި ތެލަކީ ރާއްޖޭގައި އެސްޓީއޯ އިން ކޮންޓްރޯލް ކުރަމުންދާ މޮނޮޮޕޮލީއެއް ކަމަށެވެ. އެހެންވެ މި މޮނޮޕޮލީ އާ އެކު ރައްޔިތުންނަށް ހެޔޮ އަގުގައި ބާވަތްތައް އެސްޓީއޯ އިން ފޯރުކޮށް ދޭން ޖެހޭނެ ކަމަށް ވިދާޅުވި އެވެ.
"މާލޭގެ ސަރަހައްދަށް ލިބޭ އަގުގައި އައްޑު އާއި ފުވައްމުލަކާއި ހުވަދު މި ހިދުމަތް އެސްޓީއޯ އިން ފޯރުކޮށް ދިނުމަށް އަޅުގަނޑު ހަރު އަޑުން ގޮވާލަން،" އިބްރާހީމްދީ ވިދާޅުވި އެވެ.