ކުރީގެ ރައީސް އަބްދުﷲ ޔާމީން ފުލުހަށް ހާޒިރުކުރާ ވަގުތާއި ދިމާކޮށް އެމްޑީޕީން މާދަމާ މަގުމައްޗަށް ނިކުންނަން ނިންމައިފިއެވެ.
އެމްޑީޕީން މިރޭ ކުރި ޓްވީޓެއްގައި ބުނީ ޔާމިން ކޮށްފައިވާ ވައްކަންތައް އެމަނިކުފާނަށް ހަނދާން ކޮށްދިނުމަށް ދިވެހި ރައްޔިތުން މާދަމާ މެންދުރު 13:00 އަށް އެމްޑީޕީ ހަރުގެ ކުރިމައްޗަށް ނިކުމެ ވަޑައިގެންނެވުން އެދޭ ކަމަށެވެ.
Raees Yameen kohfaivaa vakkanthah eynaa ah handhaan kohdheyn Dhivehi Rayyithun maadhama (15/12) mendhuru 1:00 ah MDP Haruge kurimachchah nukume vadaigendhevvun edhen.
— MDP Youth Wing🎈 (@MDPYouth) December 14, 2018
ޔާމީން ފުލުހަށް ހާޒިރުވާން އަންގާފައިވަނީ މާދަމާ މެންދުރު 14:00 އަށެވެ. ޔާމީން ފުލުހަށް ހާޒިރުވާން ނިންމާފައިވަނީ ކާރުކޮޅުގެ ބަދަލުގައި ހިންގަވާފައެވެ.
ޔާމީންގެ ވަކީލު އައިޝަތު އާޒިމާ ޝުކޫރު އިއްޔެ ވިދާޅުވެފައިވާ ގޮތުގައި ޔާމީން ފުލުހަށް ހާޒިރުކުރަނީ އެމަނިކުފާނުގެ އެކައުންޓަށް ރިޔާސީ އިންތިހާބުގެ ދުވަސްވަރު ފައިސާ ވަދެފައިވާތީ އެ މައްސަލަ ބެލުމަށް ކަމަށެވެ. އަދި އެ އެކައުންޓަކީ ރިޔާސީ އިންތިހާބުގެ ގާނޫނީ އޮނިގަނޑުގައިވާ ގޮތުން އިލެކްޝަންސް ކޮމިޝަނަށް ޑިކްލެޔާ ކުރެއްވި އެކައުންޓެއް ކަމަށްވެސް އާޒިމާ ވިދާޅުވިއެވެ.
ޔާމީން ފުލުހަށް ހާޒިރުކުރާ ވަގުތު އެމްޑީޕީން މަގުމައްޗަށް ނިކުންނަން ތައްޔާރުވަމުންދާއިރު، ޕީޕީއެމްގެ ސަޕޯޓަރުން ވެސް ޔާމީން ފުލުހަށް ހާޒިރުކުރާ ވަގުތު އެ ސަރަހައްދަށް އެއްވުމަށް ވަނީ ހަމަޖެހިފައެވެ.