ވަކި މީހަކަށް އަމާޒުކޮށް ގާނޫނު ހަދަން ތާއީދު ނުކުރައްވާ ކަމަށް، ކުރީގެ ނައިބު ރައީސް ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.
ޖަމީލް މިހެން ވިދާޅުވެފައިމިވަނީ ރައީސުލްޖުމްހޫރިއްޔާކަން ކޮށްފައިވާ ބޭފުޅަކަށް ރައްޔިތުން މަޖިލީހަށް ވާދަނުކުރެވޭ ގޮތަށް މަޖިލީހަށް އިސްލާހެއް ހުށަހަޅާފައިވާ ދަނޑިވަޅެއްގައެވެ. ރައްޔިތުން މަޖިލީހުގެ އިންތިހާބުތަކާ ބެހޭ ގާނޫނަށް މި އިސްލާހު ހުށަހެޅުއްވީ ދިއްދޫ ދާއިރާގެ ޖުމްހޫރީ ޕާޓީގެ މެންބަރު އަބްދުއްލަތީފު މުހައްމަދެވެ.
މިކަމާ ގުޅިގެން ޖަމީލް މިއަދު ކުރެއްވި ޓްވީޓެއްގައި ވިދާޅުވީ ވަކި މީހަކަށް އަމާޒުކޮށް ގާނޫނު ހަދަން ތާއީދު ނުކުރައްވާ ކަމަށާއި އެ އިސްލާހާއި ދެކޮޅަށް ޕާޓީތަކުން މަސައްކަތްކުރާތަން ފެނުމަކީ އުފާވާ ކަމެއް ކަމަށެވެ. އަދި ވަކި މީހަކާއި ޖެހުމުން އުސޫލުތައް އެއްކިބާކޮށްގެން ނުވާނެކަމަށާއި، މިފަދަ އުސޫލުތަކުގައި ހިފަހައްޓަންޖެހޭނީ ވަކި މީހަކަށް ވާތީ ނޫން ކަމަށްވެސް ޖަމީލް ވިދާޅުވިއެވެ.
I don't support any legislation targeting individuals. Happy to see democratic parties taking firm stance against attempts to bar ex-presidents from contesting parliamentary elections. I wish to see all such principles followed; principles should matter regardless of the person. pic.twitter.com/X3Lh99rmPY
— Mohamed Jameel Ahmed (@MJameelAhmed) January 16, 2019
ދިއްދޫ ދާއިރާގެ މެމްބަރު މިފަދަ އިސްލާހެއް ހުށަހަޅާފައިވާއިރު އަންނަ އޭޕްރީލް މަހު ބާއްވާ ރައްޔިތުންގެ މަޖިލީހުގެ އިންތިހާބުގައި ވާދަކުރައްވާނެކަން ކުރީގެ ރައީސް މުހައްމަދު ނަޝީދު ވަނީ އިއުލާންކުރައްވާފައެވެ. ނަޝީދު ވާދަކުރައްވަން ނިންމަވާފައިވަނީ މައްޗަންގޯޅީ މެދު ދާއިރާ އަށެވެ.
މި އިސްލާހާއި ގުޅިގެން ދިއްދޫ ދާއިރާގެ މެމްބަރު އަބްދުއްލަތީފް އަށް ބޮޑެތި ފާޑުކިޔުންތަކެއް އަމާޒުވަމުން އަންނައިރު، އޭނާ ނިސްބަތްވެ ވަޑައިގަންނަވާ ޖުމްހޫރީ ޕާޓީން ވަނީ އެ އިސްލާހު އަނބުރާ ނެގުމަށް އޭނާ އަށް އަންގާފައެވެ. ނަމަވެސް އަދި މިހާތަނަށް އެ އިސްލާހު އޭނާ އަނބުރާ ގެންދަވާފައެއް ނުވެއެވެ.
މަޖިލިސް އިންތިހާބުގައި ކުރީގެ ނައިބު ރައީސް ޑރ.މުހައްމަދު ޖަމީލް ވެސް ވާދަކުރައްވަން ނިންމަވާފައިވާއިރު، ކުރީގެ ސަރުކާރުތަކުގައި ވަޒީރުކަން ކުރެއްވި ބައެއް ބޭފުޅުން ވެސް މަޖިލީހަށް ކުރިމަލައްވާނެކަން މިހާރު ވަނީ އިއުލާން ކުރައްވާފައެވެ.