ރައްޔިތުންގެ މަޖިލީހުގެ އިންތިހާބުގެ ކުރިން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ މައްސަލަ ތަހުގީގު ކުރަންޖެހޭ ކަމަށް ކިނބިދޫ ދާއިރާގެ ޖުމްހޫރީ ޕާޓީގެ މެމްބަރު އަބްދުﷲ ރިޔާޒު ވިދާޅުވެއްޖެއެވެ.
ރިޔާޒު މިއަދު ކުރެއްވި ޓްވީޓެއްގައި ވިދާޅުވީ 19 ވަނަ ރައްޔިތުންގެ މަޖިލީހަކީ ނަޒާހަތްތެރި މެންބަރުން ތިބިތަނަކަށް ހަދަން ބޭނުންނަމަ އިންތިހާބުގެ ކުރިން އެމްއެމްޕީއާރުސީގެ ހިޔާނާތުގެ މައްސަލަ ރަނގަޅަށް ތަހުގީގު ކުރަންޖެހޭ ކަމަށެވެ.
19 vana rayyithunge majlihakee nazaahaiytheri memberun thibithanakah hadhan beynunnama inthikhaabuge kurin MMPRC ge massala rangalhah thahqeeq kuran jehey! https://t.co/ltMvex6fNX
— Abdulla Riyaz MP (@riyazabdulla) February 10, 2019
ރިޔާޒު މިހެން ވިދާޅުވިއިރު އެމްއެމްޕީއާރްސީ ބޮޑު ޚިޔާނާތުގެ ފައިސާ ޖަމާވި މަޖިލިސް މެމްބަރުންނާއި ކުރީގެ ސަރުކާރުގެ އިސް އޮފިޝަލުންގެ ނަންތައް ހާމަކުރުމަށް ގޮވާލައި ބޮޑު މުޒާހަރާއެއް މި މަހުގެ 15 ވަނަ ދުވަހު ބޭއްވުމަށް ވަނީ ނިންމާފައެވެ.
މި މީހުންގެ ނަންތައް ހާމަކުރުމަށް ގޮވާލައި ބޮޑު މުޒާހަރާއަކަށް ތައްޔާރުވަމުން އަންނަ ކަން އިއުލާން ކޮށްފައިވަނީ އޭޖީ އޮފީހުގެ ކުރީގެ ސްޓޭޓް ކައުންސެލް މަރިޔަމް ޝުނާނާއެވެ.
ޖުމުލަ 155 މީހުންގެ އެކައުންޓަށް އެމްއެމްޕީއާރްސީގެ ހިޔާނާތުގެ ފައިސާ އިން އެކި މިންވަރުން ޖަމާވެފައިވާ ކަމަށް އޭސީސީން ބުނެފައިވި ނަމަވެސް އޭގެ އެއްވެސް ތަފްސީލެއް ދީފައެއް ނުވެއެވެ. ފައިސާ ނެގި މީހުންގެ ތެރޭގައި ރައްޔިތުންގެ މަޖިލީހުގެ 18 ވަނަ މަޖިލިސް ތަމްސީލު ކުރެއްވި ބޮޑު އަޣުލަބިއްޔަތެއް ހިމެނޭ ކަމަށް އަޑު ފެތުރިފައިވެއެވެ.
18 ވަނަ މަޖިލީހުގައި ތިއްބެވި ވަރަށް ގިނަ މެމްބަރުން އަންނަން އޮތް މަޖިލީހަށް ވެސް ކުރިމަތިލާފައިވާއިރު ޚިޔާނާތުގެ ފައިސާ ނެގި ފަރާތްތައް ހާމަކުރުމަށް އެތައް ބަޔަކު އަންނަނީ ގޮވާލަމުންނެވެ.