ދިވެހިރާއްޖޭގެ ކުޅިވަރާއި ބެހޭ ޤާނޫނުގެ ދަށުން އެކުލަވާލައިފައިވާ ސްޕޯޓްސް ކައުންސިލް އުވާލައިފިއެވެ.
ޔޫތު މިނިސްޓަރ އަޙްމަދު މަހްލޫފު މިއަދު ކުރެއްވި ޓްވީޓެއްގައި ވިދާޅުވީ ކުރީގެ ރައީސް ޢަބްދުﷲ ޔާމީންގެ ސަރުކާރުން ފާސްކޮށްފައިވާ ކުޅިވަރާއި ބެހޭ ޤާނޫނުގެ ދަށުން އެކުލަވާލުމަށް ބުނެފައިވާ ސްޕޯޓްސް ކައުންސިލް ޤާނޫނާއި އެއްގޮތަށް އެކުލަވާލުމަށްޓަކައި މިހާރު އޮތް ކައުންސިލް އުވާލެވިފައިވާ ކަމަށެވެ.
Raees Yameen ge sarukaarun ekulavaalaafaivaa Sports Council,Qaanoonu number 30/2015 aai ehgothah ekulavaalumah, hingamundhaa Sports Council miadhu vanee uvaalevifa.Dhen council ekulavaalaanee inthikhaabu kuranjehey membarunnaai eku.
Council membarunnah shukuru adhaakuran.— Ahmed Mahloof (@AhmedMahloof) June 16, 2019
މި ކައުންސިލްގައި ހިމެނެނީ ކުޅިވަރާބެހޭ ވުޒާރާއިން މިނިސްޓަރު އައްޔަންކުރައްވާ ދެ ބޭފުޅަކާއި، ކުޅިވަރާބެހޭ ވަޒީރު އައްޔަންކުރައްވާ އަންހެން ދެ ބޭފުޅަކާއި، ކުޅިވަރާބެހޭ ވަޒީރު އައްޔަންކުރައްވާ ގާނޫނީ ވަކީލަކާއި، އެޑިޔުކޭޝަން މިނިސްޓްރީ ތަމްސީލް ކުރުމަށް އެ ވުޒާރާގެ ވަޒީރު އައްޔަންކުރައްވާ މެންބަރަކާއި، ގައުމީ ކުޅިވަރު އެސޯސިއޭޝަންތަކުން އޮލިމްޕިކް ކުޅިވަރުތައް ތަމްސީލް ކުރުމަށް ދެ މެންބަރުންނާއި ނޮން އޮލިމްޕިކް ކުޅިވަރުތައް ތަމްސީލް ކުރުމަށް ދެ މެންބަރުން އަދި މޯލްޑިވްސް އޮލިމްޕިކް ކޮމިޓީގެ ހިންގާ ކޮމިޓީން ކަނޑައަޅާ މެންބަރެކެވެ.
ސްޕޯޓްސް ކައުންސިލްގެ މައިގަނޑު މަސައްކަތަކީ ކުޅިވަރު އެސޯސިއޭޝަންތަކާ ގުޅޭ ކަންކަން ބެލެހެއްޓުމާއި އެތުލީޓުން ކުރިއަރުވައި ތަރައްގީކުރަން މަސައްކަތް ކުރުމެވެ. ސްޕޯޓްސް ކައުސިލްގެ ރައީސަކީ ރާއްޖޭގެ ކުޅިވަރަށް ގިނަގުނަ ހިދުމަތްތަކެއް ކުރައްވަމުން ގެންދަވާ އިބްރާހީމް އިސްމާއީލެވެ.
މި ގާނޫނުގައި ބުނެފައިވަނީ ގާނޫނަށް އަމަލުކުރަން ފަށާތާ 60 ދުވަސް ތެރޭގައި 11 މެންބަރުންގެ މައްޗަށް އެކުލެވޭ ކުޅިވަރާއި ބެހޭ ޤައުމީ މަޖިލީހެއް ނުވަތަ ސްޕޯޓްސް ކައުންސިލެއް އެކުލަވާލަން ޖެހޭނެ ކަމަށެވެ. އަދި އެ ކައުންސިލް ނުވަތަ ގައުމީ މަޖިލިސް އެކުލަވާލާނީ ކުޅިވަރާއި ބެހޭ ވަޒީރު ކަމަށްވެސް ގާނޫނުގައި ބަޔާންކޮށްފައިވެއެވެ.
ދެން ސްޕޯޓްސް ކައުންސިލް އެކުލަވާލާނީ އިންތިޚާބު ކުރަންޖެހޭ މެންބަރުންނާއި އެކުގައި ކަމަށްވެސް މިނިސްޓަރ ވިދާޅުވިއެވެ.