ކޮންމެ މުއައްސަސާއަކުން ވެސް އެ މުއައްސަސާއެއްގެ ގާނޫނީ ހުދޫދުގެ ތެރެއިން ކަންކަން ކުރެއްވުމަށް ކުރީގެ ރައީސް މައުމޫން އަބްދުލްގައްޔޫމް ގޮވާލައްވައިފިއެވެ.
މައުމޫން މިކަމަށް ގޮވާލައްވާފައިމިވަނީ ޖުޑީޝަލް ސާވިސް ކޮމިޝަނާއިސުޕްރީމް ކޯޓާއި ދެމެދު ބޮޑު "ކޯޅުމެއް" ފެށިފައިވާ ދަނޑިވަޅެއްގައެވެ.
މައުމޫން މިއަދު ކުރެއްވި ޓްވީޓެއްގައި ވިދާޅުވީ ކޮންމެ މުއައްސަސާއަކުން ވެސް ގާނޫނު އަސާސީ ތަންދޭ ގޮތެއްގެ މަތިން އަދި އެ މުއައްސަސާއެއްގެ ގާނޫނީ ހުދޫދުގެ ތެރެއިން ކަންކަން ކުރެއްވުމަށް ދިވެހި ރައްޔިތެއްގެ ހައިސިއްޔަތުން ގޮވާލާ ކަމަށެވެ.
Komme muassasaa akun ves qaanoon asaasee thandhey gotheh ge mathin adhi e muassasaa eh ge qaanoonee hudhoodhuge therein kankan kurevvumah dhivehi rayyitheh ge haisiyyathun alhugan’du govaalan.
— Maumoon Abdul Gayoom (@maumoonagayoom) June 18, 2019
ޖޭއެސްސީ އާއި ސުޕްރީމް ކޯޓާއި ދެމެދު "ކޯޅުން" ފެށިފައިވަނީ، ޖޭއެސްސީ އަށް ހުށަހެޅުނު މައްސަލައަކާ ގުޅިގެން ސުޕްރީމް ކޯޓުގެ ފަނޑިޔާރު އަބްދުﷲ ދީދީ ސަސްޕެންޑު ކުރަން އެ ކޮމިޝަނުން ނިންމި ހިސާބުންނެވެ.
އެގޮތުން ސުޕްރީމް ކޯޓުން ވަނީ އެ ކޯޓަށް ދީދީ ހުށަހަޅުއްވާފައިވާ ދުސްތޫރީ މައްސަލަ ބަލައި ނިމެންދެން އެ ނިންމުމަށް އަމަލުކުރުން ފަސްކުރަން ޖޭއެސްސީގެ މައްޗަށް އަމުރުކޮށްފައެވެ. ނަމަވެސް ޖޭއެސްސީން ވަނީ ސުޕްރީމް ކޯޓުގެ އަމުރަށް ގޮންޖައްސަވައި ދީދީގެ ސަސްޕެންޝަން ދަމަހައްޓާފައެވެ.
ފަނޑިޔާރު ދީދީގެ އިތުރުން ވެސް ސުޕްރީމް ކޯޓުގެ އިތުރު ތިން ފަނޑިޔާރެއްގެ މައްސަލަ ޖޭއެސްސީ އަށް ވަނީ ހުށަހަޅާފައެވެ. ނަމަވެސް އެއީ ކޮން ފަނޑިޔާރުންނެއް ކަމެއް ޖޭއެސްސީން ހާމަކޮށްފައެއް ނުވެއެވެ.