ރައްޔިތުންގެ މަޖިލިހުގެ މެމްބަރުންގެ އިތުބާރު ނެތްކަމުގެ ވޯޓު، އެ ދާއިރާއެއްގެ ރައްޔިތުންގެ މެދުގައި ނެގޭނެ ގޮތް ހަދަން ތާއީދުކުރައްވާ ކަމަށް ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެއްޖެއެވެ.
އުޝާމް މިހެން ވިދާޅުވެފައިމިވަނީ އެކަމާ ގުޅޭ ބިލެއް އާންމު ފަރާތަކުން ތައްޔާރުކޮށް މަޖިލީހަށް ވެއްދުމަށްޓަކާ މެމްބަރުންގެ ތާއީދު ހޯދަމުންދާ ދަނޑިވަޅެއްގައެވެ. އެ ބިލުގެ ޑްރާފްޓްގެ މަސައްކަތް ކޮށްފައިވަނީ ގާނޫނީ ވަކީލު ހަމްޒާ ހަލީލެވެ. މަޖިލީހުގެ މެމްބަރަކު އެފަދަ ގޮތަކަށް ވަކިކުރެވޭނީ ގާނޫނު އަސާސީ އަށް އިސްލާހު ގެނެސްގެންނެވެ.
އެކަމާ ގުޅިގެން މެމްބަރު އުޝާމް ކުރެއްވި ޓްވީޓެއްގައި ވިދާޅުވީ ރައްޔިތުންނަށް މެމްބަރުން ވަކިކުރެވޭ ފަދަ އުސޫލަކަށް އޭނާ ތާއީދުކުރައްވާނެ ކަމަށެވެ.
"އަޅުގަނޑަށް ހީވަނީ ހަމްޒާ އެންމެ ފުރަތަމަ ބޭނުން ވަނީ އޭނާގެދާއިރާގެ މެމްބަރު މެދުވެރިކޮށް މި ބިލު މަޖިލީހަށް ހުށަހަޅުއްވަންހެން. އެކަން ކާމިޔާބު ނުވެއްޖެނަމަ، އަދި ހަމްޒާ އަޅުގަނޑުގެ އެހީ ބޭނުންވާ ނަމަ، އެކަން ކުރަން ތައްޔާރު" އުޝާމް ވިދާޅުވިއެވެ.
I will definitely support a MP Recall Act. I think right now @HamzaKhalyl wants to first try get it to parliament through his MP. If that doesn’t work out and if he wants my help, I’m ready to do it.
— Ahmed Usham (@a_usham) February 16, 2020
ހަމްޒާގެ ދާއިރާ ތަމްސީލު ކުރައްވަނީ ގަލޮޅު އުތުރު ދާއިރާގެ މެމްބަރު އަދި މަޖިލީހުގެ ނައިބު ރައީސް އީވާ އަބްދުﷲ އެވެ. ހަމްޒާ ވަނީ މިދިޔަ މަޖިލިސް އިންތިހާބުގައި އީވާއާ ވާދަކުރައްވާފައެވެ.
ހަމްޒާ ޑްރާފްޓް ކުރެއްވި ބިލުގައި ބުނެފައިވަނީ މެމްބަރާ މެދު އިތުބާރު ގެއްލިއްޖެ ނަމަ، ވޯޓަށް ދިޔުމަށް، ދާއިރާގެ ތިންބައި ކުޅަ އެއްބައި މީހުން ސޮއިކޮށްފައިވާ ލިޔުމެއް އިލެކްޝަންސް ކޮމިޝަނަށް ހުށަހަޅަން ޖެހޭނެ ކަމަށެވެ. އަދި ލިޔުން ހުށަހަޅާތާ 45 ދުވަހުގެ ތެރޭގައި އެ ދާއިރާއެއްގެ ރައްޔިތުންގެ މެދުގައި މެމްބަރު މަގާމުން ވަކި ކުރުމަށް ފެންނަ ނުފެންނަ ވޯޓެއް ބާއްވަން ޖެހޭނެ ކަމަށާއި މެމްބަރު ގޮނޑީގައި ބައިންދަން ނުފެންނަ ކަމަށް ގިނަ މީހުން ވޯޓުލައިފި ނަމަ، ގޮނޑި ގެއްލޭނެ ކަމަށް އެ ބިލުގައި ބުނެފައިވެއެވެ.
ހަމްޒާގެ ބިލަކީ ގާނޫނު އަސާސީއަށް އިސްލާހު ގެންނަ ބިލަކަށް ވާއިރު، ގާނޫނު އަސާސީއަށް އިސްލާހު ގެނެވެނީ މަޖިލީހުގެ މެންބަރުންގެ ތިންބައި ކުޅަ ދެބައިގެ އަޣުލަބިއްޔަތުންނެވެ.