ބީއެމްއެލް އިން ލޯނުތައް ދެއްކުން ފަސްކޮށްދޭ ހަ މަސްދުވަހަށް އިންޓްރެސްޓް ދައްކަން ނުޖެހޭނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިނިސްޓަރު އަމީރު މިހެން ވިދާޅުވީ ބީއެމްއެލްގެ ހުރިހާ ލޯނުތަކެއް ދެއްކުން ހަ މަސްދުވަހަށް ފަސްކޮށްދީފައިވާ މުއްދަތުގައި އިތުރު އިންޓްރެސްޓެއް އަރާނެތޯ ގިނަ ބަޔަކު ސުވާލު އުފައްދަމުންދާ ދަނޑިވަޅެއްގައެވެ.
އެކަން ސާފުކޮށްދެއްވުމަށް މިނިސްޓަރު އަމީރު މިއަދު ކުރެއްވި ޓްވީޓެއްގައި ވިދާޅުވީ ލޯނުތައް ދެއްކުން ފަސްކޮށްދީފައިވާ ހަ މަސް ދުވަހުގެ މުއްދަތުގައި ބީއެމްއެލްއިން އެއްވެސް އިންޓްރެސްޓެއް ނުނަގާނެ ކަމަށެވެ.
In order to clarify the confusion with respect to the calculation of interest during the moratorium period announced, we would like to clarify that BML will not charge interest on interest during the 6-month moratorium period recently offered in response to Covid-19.
— Ibrahim Ameer (@iameeru) March 29, 2020
އަދި ކޮވިޑް-19 އާއި ގުޅިގެން ކަސްޓަމަރުންނާއި ރާއްޖެއަށްވެސް ވެވެން އޮތް އެހީއެއްވުމަށް ބީއެމްއެލް އިން މަސައްކަތް ކުރަމުންދާ ކަމަށްވެސް އަމީރު ވިދާޅުވިއެވެ.
ބީއެމްއެލް އިން ވަނީ އެ ބޭންކުން ދޫކޮށްފައިވާ ޕާސަނަލް، ހައުސިން އަދި ބިޒްނަސް ލޯނުތަކަށް ފައިސާ ދެއްކުން ހަ މަސް ދުވަހަށް ފަސްކޮށްދީފައެވެ.
ބީއެމްއެލް އިން ހުރިހާ ލޯނެއް ހަ މަސްދުވަހަށް ފަސްކޮށްދޭން ނިންމިއިރު، ސަރުކާރުން ވަނީ ސްޓޫޑެންޓް ލޯނު ދެއްކުން ވެސް ހަ މަސް ދުވަހަށް ފަސްކޮށްދޭން ނިންމާފައެވެ.