އެމެރިކާގެ ރައީސް ކަމުގެ ކުރައްވައި އެ މަގާމާ މިއަދު ހަވާލުވެވަޑައިގެންނެވި ޖޯ ބައިޑެންގެ ވެރިކަމުގައި އެމެރިކާ އާއި ރާއްޖެ ގުޅިގެން އިތުރަށް މަސައްކަތް ކުރުމަށް އުއްމީދު ކުރައްވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު މިހެން ވިދާޅުވީ އެމެރިކާގެ ރައީސް ކަމުގެ ހުވާ ބައިޑެން އަދި ނައިބު ރައީސްކަމުގެ ހުވާ ކަމަލާ ހެރިސް ކުރެއްވުމާއި ގުޅިގެން މަރުހަބާ ވިދާޅުވެ ކުރެއްވި ޓްވީޓެއްގައެވެ.
އެގޮތުން ރައީސް ސޯލިހު ވިދާޅުވީ އެމެރިކާ އާއި ރާއްޖެ އަކީ ގާތް އެކުވެރި ދެ ގައުމު ކަމަށާއި ބައިޑެންގެ ވެރިކަމުގައި ގުޅިގެން މަސައްކަތްކޮށް އެ ގުޅުން އިތުރަށް ވަރުގަދަ ކުރުމަށް މަސައްކަތް ކުރައްވަން އުއްމީދު ކުރައްވާ ކަމަށެވެ.
Congratulations to Pres. @JoeBiden and VP @KamalaHarris on their inauguration respectively as the 46th President and 49th Vice Pres. of the US.
Maldives and US are friends and partners and we look forward to working with you to grow our friendship and further our shared values.— Ibrahim Mohamed Solih (@ibusolih) January 20, 2021
އުމުރުފުޅުން 78 އަހަރުގެ ބައިޑެން އަކީ އެމެރިކާގެ ރައީސްކަމުގެ މަގާމާއި ހަވާލުވެވަޑައިގެންނެވި 46 ވަނަ ފަރާތެވެ. އަދި އެގައުމުގެ ފުރަތަމަ އަންހެން ނައިބު ރައީސާގެ މަގާމާއި ހަވާލުވެވަޑައިގެންނެވި ހެރިސް އަކީ އެ މަގާމާއި ހަވާލުވެވަޑައިގަންނަވާ 49 ވަނަ ފަރާތެވެ.
ހުވާ ކުރެއްވުމުގެ ރަސްމިއްޔާތަށްފަހު ބައިޑެން ވަނީ ގައުމާއި މުހާތަބު ކުރައްވާފައެވެ. އެގޮތުން ބައިޑެންގެ މި ތަގުރީރުގައި ވަނީ އެމެރިކާގެ ރައްޔިތުން އެއްބައިވަންތަ ކުރުމަށް މަސައްކަތް ކުރައްވާނެ ކަމަށް ވިދާޅުވެފައެވެ.