ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހައްޔަރުކޮށްފައި ނޫނީ ރައީސް އިބްރާހިމް މުހައްމަދު ސޯލިހު ހުއްޓާލާނެހެން ހީނުވާ ކަމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވިދާޅުވެއްޖެ އެވެ.
އީވާ ކުރެއްވި ޓްވީޓެއްގައި ވިދާޅުވީ ގދ. ރަތަފަންދޫ ވޯޓުފޮށި ކައިރީ ހުރި ރައީސް ނަޝީދު ގެ މަންދޫބުވެސް ހައްޔަރުކޮށްފައިވާ ކަމަށެވެ. އަދި މިދާ ވަރުން ދާނަމަ ރައީސް ނަޝީދު ހައްޔަރުކޮށްފައި ނޫނީ ރައީސް ސޯލިހު ހުއްޓާލާނެހެން ހީނުވާ ކަމަށްވެސް އީވާ ވިދާޅުވި އެވެ.
ގދ. ރަތަފަންދޫ ވޯޓުފޮށިކައިރީ ހުރި ރައީސް ނަޝީދު ގެ މަންދޫބުވެސް ހައްޔަރުކޮށްފި. މިދާ ވަރުން ދާނަމަ ރައީސް @MohamedNasheed ހައްޔަރުކޮށްފަނޫނީ @ibusolih ހުއްޓައިލާނެހެން ހިއެއް ނުވޭ. @MDPSecretariat pic.twitter.com/XSm9QHiexH
— Eva Abdulla 🎈❓ (@evattey) January 28, 2023
އެމްޑީޕީގެ ރިޔާސީ ޕްރައިމަރީގެ ވޯޓުލުން ކުރިއަށްދާއިރު މައްސަލަތަކެއް ފާހަގަކޮށް ސޯޝަލް މީޑިއާގައި އެކަން އަންނަނީ ހިއްސާކުރަމުންނެވެ. އެގޮތުން ވޯޓުލާ ލިސްޓުގައި ނަން ނެތް މީހުން ވޯޓުލުމާއި، މީހުންގެ ބަދަލުގައި އެހެން މީހުން ވޯޓުލުންފަދަ މައްސަލަތަކެއް އަންނަނީ ފާހަގަ ކުރަމުންނެވެ. އަދި ގައްދޫގައި "ބޮޑީ ކެމެރާ" ހަރުކޮށްގެން ވޯޓުލީ ކަމަށްބުނެ ވޯޓުލާ މަރުކަޒުގައި ހަމަނުޖެހުން ހިނގިއިރު ބައެއް ރަށްރަށުގެ ވޯޓު ފޮށިތައް ވަނީ ފަޅާލާފަ އެވެ.
އެމްޑީޕީ ރިޔާސީ ޕްރައިމަރީގެ ވޯޓުލުން ކުރިއަށްދާނީ ހެނދުނު 9 އިން ހަވީރު 5 ޖެހުމާ ހަމައަށެވެ.
މި އިންތިހާބުގައި 57،257 މީހުންނަށް ވޯޓުލުމުގެ ހައްގު ލިބިފައިވެއެވެ. އަދި ޖުމުލަ 243 ވޯޓު ފޮށި މި އިންތިހާބުގައި ބަހައްޓާފައިވެއެވެ.