އެސްޓީއޯ އިން އައްޑޫގައި އަންނަ ހޮނިހިރު ދުވަހުގެ ރޭ ޕްރޮމޯޝަނަލް އިވެންޓެއް ބާއްވާ ގޮތަށް ހަމަޖައްސައިފި އެވެ.
އެސްޓީއޯ މަރަދޫފޭދޫ ބްރާންޗްގެ އޮފިޝަލަކު ވިދާޅުވީ އެ އިވެންޓް އޮންނާނީ އައްޑޫގައި މިހާރު ކުރިއަށްދާ ސްޓްރީޓް ސޮކާ 2015 ގެ ފައިނަލް މެޗް ކުރިއަށްދާ އިރު ކަމަށެވެ. ސްޓްރީޓް ސޮކާ ކުރިއަށް ގެންދަނީ ގަމުގަ އެވެ.
އޭނާ ވިދާޅުވީ އެ ރޭ ގަމުގައި ބާއްވާ އިވެންޓްގައި އެސްޓީއޯ އިން ވިއްކާ ބްރޭންޑްތަކާ ބެހޭ މައުލޫމާތު ވަރަށް ފުޅާކޮށް ފޯރުކޮށް ދެވޭނެ ކަމަށެވެ.
އަދި އެތަނުން ވިއްކާ ބްރޭންޑްތަކުން ތައްޔާރު ކުރާ ބައެއް ކާނާތަކާއި ބުއިންތައް އާންމުންނަށް ޓެސްޓް ވެސް ކުރެވޭނެ ކަމަށް އެސްޓީއޯ އިން ބުންޏެވެ.
އެސްޓީއޯ އިން ބުނީ މި އިވެންޓްގެ ސަބަބުން އެސްޓީއޯ އިން ވިއްކާ ތަފާތު ބާވަތްތަކުގެ އައިޓަމްތަކާ ބެހޭ ވަރަށް ގިނަ މައުލޫމާތު ކަސްޓަމަރުންނަށް ލިބިގެން ދާނެ ކަމަށެވެ.
އެގޮތުން މިހާރު ކުރިއަށް ގެންދާ ޕްރޮމޯޝަންތަކާއި އައިޓަމްތަކުގެ އަގުތައް ކަސްޓަމަރުންނަށް އޮޅުން ފިލުވައި ދޭނެ އެވެ.
މައިލޯ އިން ސްޕޮންސަކޮށްގެން މި ފަހަރު ބާއްވާ ސްޓްރީޓް ސޮކާ 2015 ގެ ފައިނަލް މެޗް ކުޅެން ހަމަޖެހިފައި ވަނީ ހޮނިހިރު ދުވަހުގެ ރޭ 9:00 ގަ އެވެ.