އެމްއެންޑީއެފް ސަދަން އޭރިޔާގައި މަސައްކަތް ކުރާ ސިފައިންގެ ބޭފުޅަކު ފޭސްބުކް ސްޓޭޓަސްގައި ކާނަލް ނާޒިމާ އެކު ހުރި ކަމަށް ލިޔުމުން މާލެ ގެންގޮސް ސިފައިންގެ ބެލުމުގެ ދަށުގައި ބަންދުކޮށްފި އެވެ.
"އައްޑޫ ލައިވް" އަށް މައުލޫމާތު ލިބިފައިވާ ގޮތުގައި އެމްއެންޑީއެފް މާލެ ގެންގޮސް ބަންދުކޮށްފައި ވަނީ އެމްއެންޑީއެފްގެ ލާންސް ކޯޕްރަލް އެއްގެ މަޤާމުގައި ހުރި ފޭދޫ ޝެހެނާޒްވިލާ ޙަސަން ފިރާޒެވެ.
އޭނާ މިވަގުތު މަސައްކަތް ކުރަމުން ދަނީ އެމްއެންޑީއެފް މާލޭ އޭރިޔާގެ އެޑްމިން ބައިގައި އެވެ. އަދި މާލެ އިން ބޭރަށް ދިއުން އޭނާ އަށް މަނާކޮށްފައިވާ ކަން ވެސް ވަނީ އެނގިފަ އެވެ.
އެމްއެންޑީއެފްގެ ބަލަމުންދާ މައްސަލަތަކާއި ގުޅިގެން ސިފައިންގެ ބޭފުޅުން އެމްއެންޑީއެފްގެ މަރުކަޒެއްގައި ބަންދު ކުރުމަކީ އެމްއެންޑީއެފް އިން އާއްމުކޮށް އަޅަމުން ގެންދާ ފިޔަވަޅެކެވެ.
އެމެއެންޑީއެފް ސަދަން އޭރިޔާގައި މަސައްކަތް ކުރައްވާ ސިފައިންގެ ބޭފުޅަކު ނޫހުގައި ނަން ނުޖެހުމަށް ޝަރުތުކޮށް ބުނި ގޮތުގައި އެމްއެންޑީއެފް ސަދަން އޭރިޔާގައި މަސައްކަތް ކުރާ ސިފައިންގެ ތެރެއިން ގިނަ ބޭފުޅުން ތިބީ ކުރީގެ ޑިފެންސް މިނިސްޓަރ ކާނަލް ނާޒިމް ޖަލަށް ލުމާއި ގުޅިގެން އެކަމާއި ހިތްހަމަނުޖެހިފައެވެ. ނަމަވެސް ނާޒިމް އަށް ތާއީދުކޮށް ވާހަކަ ނުދެއްކުމަށް އިސްވެރިން އަންގާފައިވާ ކަމަށް ވެސް އޭނާ ބުންޏެވެ.