މިއަދު ހަވީރު 5:45 ހާއިރު ލިންކް ރޯޑުގައި ހިނގި ނުރައްކާތެރި އެކްސިޑެންޓެއްގައި 2 ޒުވާނަކު މަރުވެއްޖެއެވެ.
ހިތަދޫ ލިންކް ރޯޑުގެ ކްރެސް ގަޑަން ރެސްޓޯރެންޓާއި ދިމާލުން ޕަލްސާ ސައިކަލަކާއި ޕިކަޕެެއް ޖެހި ހިނގި ހާދިސާގައި މަރުވެފައިވަނީ ސައިކަލްގައި ތިބި ދެ ޒުވާނުން ކަމަށްވާ ސ. ހިތަދޫ ރާހަތުއްސަބާހު ހުސެއިން ޖުމާން އަލީ 18، އާއި ސ. ހިތަދޫ އަސްރާ މަންޒިލް އިބްރާހިމް އަސްވާދު 27، އެވެ.
ހޮސްޕިޓަލް ސަރަހައްދުގައި ހުރި މީހަކު އައްޑޫލައިވްއަށް ކިޔައިދިންގޮތުގައި އެދެޒުވާނުން ހޮސްޕިޓަލަށް ގެނައި އިރުވެސް ވަރަށް ސީރިއަސް ކަމަށެވެ.
ހޮސްޕިޓަލްގެ އޮފިޝަލަކު ވިދާޅުވީ ދެ ޒުވާނުން ހޮސްޕިޓަލަށް ގެނައި އިރުވެސް ނޭވާ ނުލާކަމަށާއި، އަދި މިވަގުތަށް އިތުރު މައުލޫމާތު ދެވެން ނެތް ކަމަށެވެ.
