ނިމިގެންދިޔަ އައްޑޫ ސިޓީ ކައުންސިލްގެ ފޭދޫ ދާއިރާގެ ކައުންސިލަރު އަހްމަދު މިރުޒާދު މިރާ ދާދި ދެންމެއަކު ޕީޕީއެމްއަށް ސޮއިކޮށްފިއެވެ.
މިރާ ޕީޕީއެމްއަށް ސޮއިކުރީ ރައީސް ޔާމީންގެ އަނބިކަބަލުންގެ އޮފީހުގައި ބޭއްވި ރަސްމިއްޔާތެއްގައެވެ. މިރަސްމިއްޔާތުގައި ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު އިބްރާހިމް ދީދީ (އައިބީ) އާއި މެޓްރިކްސް މޯޑުގެ އިތުރުން ރައީސްގެ އަނބިކަބަލުން ފާޠިމަތު އިބްރާހިމް ބައިވެރިވެވަޑައިގެންނެވިއެވެ. އަދި މި ބައްދަލުވުމުގައި ފޭދޫގެ ބައެއް އިތުރު ޒުވާނުން ވަނީ ސޮއިކޮށްފައެވެ.
ފޭދޫ ހުސްވެފައިވާ ކައުންސިލް ގޮޑިއަށް ވާދަކުރުމުގެ ގޮތުން ބޭއްވި އެމްޑީޕީ ޕްރައިމަރީގައި ބައިވެރިވެ މިރާ ވަނީ ނާކާމިޔާބްވެފައެވެ. އަދި މިއަހަރު ބޭއްވި މަޖްލިސް އިންތިހާބްގެ އެމްޑީޕީ ޕްރައިމަރީގައިވެސް މިރާ ވަނީ ނާކާމިޔާބްވެފައެވެ.
މިރާ އަކީ ނަޝީދުގެ ސަރުކާރު ނިމުމަކަށް އައުމަށްފަހު ފެބްރުއަރީ 8، 2012ގައި އައްޑޫގެ ޕޮލިސް ސްޓޭޝަން ތަކާއި، ކޯޓު ތައް އަންދާލި މައްސަލާގައި ހައްޔަރު ކުރި މީހެކެވެ.