މީހުން ބަންދު ކުރުމުގެ ބަދަލުގައި ދޫނިދޫ ޕިކްނިކް އައިލެންޑަށް ހެދުން މުހިއްމު ކަމަށް، ވިލިނގިލީ ދާއިރާގެ މެމްބަރު ސައުދު ހުސެއިން ވިދާޅުވެއްޖެއެވެ.
އެކަން ހާމަކޮށް ސައުދު މިއަދު ކުރެއްވި ޓްވީޓެއްގައި ވިދާޅުވީ ތަހުގީގަށް ބަންދުކުރަންޖެހޭ ހާލަތު ވަރަށް ސާފު ކަމަށާއި ނަމަވެސް މި ގައުމުގައި އަމަލުކުރަމުންދަނީ "ރަދުން ވިދާޅުވީމަ ބަންދުކޮށްފައި ބަހައްޓާ އުސޫލާއި، ފަނޑިޔާރު މަނިކުފާނު ބަންދުކޮށްފައި ބަހައްޓާ އުސޫލަށް" ކަމަށެވެ.
Dhoonidhoo Holiday islandakah hedhun muhinmu. Thahugēgah bandhu kuranjehey hālath varah saaf, ehen namaves mi gaumuga amalu kuramun dhany radhun vidhālhuvymā bandhu koffa bahattā usoolu aa fadiyāru manikufān beynunfulhu vēma bandhu koffa bahattā usōlu! Mikan Islāh kuran jehey!1/2 https://t.co/2iTzKWSDoC
— Saud Hussain MP (@SaudVillingili) December 22, 2018
މިއީ އިސްލާހު ކުރަންޖެހޭ ކަމެއްކަން ފާހަގަކުރަމުން ސައުދު ވިދާޅުވީ ދޫނިދޫ އަކީ ބަންދުކުރަން ނުޖެހޭ އެތައް ރައްޔިތުންތަކެއް ބަންދުކޮށްފައި ބަހައްޓައިގެން އެކި ގޮތްގޮތަށް ނާޖާއިޒު ފައިދާ ހޯދަމުންދާ ރަށެއް ކަމަށެވެ. އަދި ދޫނިދޫ އަކީ ގައުމުގެ ޒުވާން ބޮޑު އާބާދީއެއް ބަންދުކޮށްގެން ހަލާކު ކުރަމުންދާ ރަށެއް ކަމަށާއި ދޫނިދޫގެ އޮޕަރޭޝަން ހުއްޓާލުމަށް ވެސް ސައުދު ވަނީ ގޮވާލާފައެވެ. އަދި އެންމެ މުހިއްމީ ހެކި ހޯދައިގެން ދައުވާ ކުރުން ކަމަށްވެސް ސައުދު ވަނީ ވިދާޅުވެފައެވެ.
މީގެއިތުރުން ސައުދު ވަނީ މިދިޔަ ސަރުކާރުގައި އޭނާ ޖަލުގައި ހޭދަކުރި މުއްދަތުގައި ކަންތައްތައް ވެގެންދިޔަ ގޮތަށް ވެސް އަލިއަޅުވާލާފައެވެ.
"ދޫނިދޫގަ ބަންދުކޮށްފައި 29 ދުވަސް. ތަހުގީގަށް ފުލުހުން ސުވާލު ކުރުމަށް ހޭދަވީ 10 މިނެޓް. މި 10 މިނެޓްގެ ބޭނުމަށް 29 ދުވަސް ޖަލުގެ ކުޑަ ގޮޅީގަ ބަންދުކުރަންޖެހޭ ސަބަބަކީ ކޮބައިތޯ؟" ސައުދު ވިދާޅުވިއެވެ.
ދޫނިދޫ ޕިކްނިކް އައިލެންޑަށް ހެދުމަށް ސައުދު ގޮވާލާފައިވާއިރު، ޖަލުތަކުގެ އޮޑިޓް ހެދުމާއިގުޅޭ ކޮމިޝަނެއް ހޯމް މިނިސްޓްރީން ދާދިފަހުން ވަނީ އެކުލާވާލާފައެވެ.
ރާއްޖޭގެ ޖަލުތަކުގެ އޯޑިޓެއް ހެދުމަކީ ސަރުކާރުގެ 100 ދުވަހުގެ ލަނޑުދަނޑިތަކުގެ ތެރޭގައި ހިމެނޭ ކަމެކެވެ. މި އޯޑިޓް ހެދުމުގެ މައިގަނޑު ބޭނުމަކީ، ޖަލުތަކުގެ މިހާރުގެ ހާލަތު ބަލައި އިޞްލާޙު ކުރަން ހުރި ކަންކަން ފާހަގަކޮށް ރިޕޯޓެއް އެކުލަވާލުމެވެ.