އިންޑިއަން އޯޝަން އައިލޭންޑް ގޭމްސް 2023 ވަނަ އަހަރު ރާއްޖޭގައި ބޭއްވުމަށް ތާއީދުކޮށް ދިނުމަށް މަޑަގަސްކާގެ އިސްވެރިންގެ ކިބައިން އެދިވަޑައިގެންފިއެވެ.
ރާއްޖޭގެ އިތުރުން 2023 ވަނަ އަހަރުގެ އައިއޯއައިޖީ ބާއްވަން ބިޑްކޮށްފައިވަނީ ކޮމޮރޮސް އާއި މަޑަގަސްކާއެވެ.
މިކަމަށް އެދިވަޑައިގެންފައިވަނީ އައިއޯއައިޖީ ބޭއްވުމަށް ރާއްޖެ އިން ކުރާ ބިޑަށް ތާއީދު ހޯއްދެވުމަށް މިވަގުތު ރާއްޖެ އިން ބޭރުގައި ތިއްބެވި ޔޫތް މިނިސްޓަރު އަހުމަދު މަހުލޫފް އާއި ފޮރިން މިނިސްޓަރު އަބްދުﷲ ޝާހިދު މަޑަގަސްކާގެ ބޮޑުވަޒީރުގެ ހާއްސަ މަންދޫބާއި އެގައުމުގެ އޮލިމްޕިކް ކޮމިޓީގެ ރައީސް އާއެކު ބޭއްވި ބައްދަލުވުމުގައެވެ.
މިނިސްޓަރު މަހުލޫފް މިއަދު ކުރެއްވި ޓްވީޓެއްގައި ވިދާޅުވީ މަޑަގަސްކާގެ ކިބައިން އެކަމަށް އެދިވަޑައިގެންފައިވަނީ އެގައުމުގައި މީގެކުރިން ދެ ފަހަރެއްގެ މަތިން އައިއޯއައިޖީ ބާއްވާފައިވާތީ ކަމަަށެވެ.
Met the Special Envoy of the Prime Minister of Madagascar Minister Hajo and the President of Madagascar Olympic Committee Hon. Siteny. Along with #Maldives, Madagascar is bidding to host 2023 IOIG. As Madagascar has hosted IOIG twice we’ve requested them to support our bid. 🇲🇻🇲🇬 pic.twitter.com/OPuM2dSnEf
— Ahmed Mahloof (@AhmedMahloof) July 13, 2019
މަޑަގަސްކާގެ ތާއީދަށް އެދިފައިވާއިރު މުބާރާތް ރާއްޖޭގައި ބޭއްވުމަށް މީގެކުރިން ސީޝެލްސް އިން ވަނީ ތާއީދުކޮށްފައެވެ.
އައިއޯއައިޖީގެ ކައުންސިލްގެ މެމްބަރުން ދާދިފަހުން ވަނީ ރާއްޖެއަށް ޒިޔާރަތްކުރައްވާ ދިވެހި ސަރުކާރާއި މޯލްޑިވްސް އޮލިމްޕިކް ކޮމެޓީއާ ބައްދަލުކޮށް ރާއްޖޭގައި ހުރި ކުޅިވަރު ވަސީލަތްތައް ބައްލަވާލައްވާފައެވެ.
ރާއްޖެއަށް ބިޑު ކާމިޔާބުވުމުގެ ފުރުސަތު ބޮޑުކަމަށް ކައުންސިލް މެމްބަރުން ވެސް ވަނީ ވިދާޅުވެފައެވެ.