އިންޑިއަން އޯޝަން އައިލެންޑް ގޭމްސްގެ ޕެރެ ކެޓަގަރީގެ 100 މީޓަރު ދުވުމުން ރާއްޖޭގެ ލޯފަން ދުވުންތެރިޔާ މުހައްމަދު މާޒިން ލޯ މެޑަލް ހާސިލުކުރުމުން ޔޫތް މިނިސްޓަރު އަހުމަދު މަހުލޫފް ތައުރީފު ކުރައްވައިފިއެވެ.
މާޒިން އަށް ތައުރީފު ކުރައްވާ މިނިސްޓަރު މަހުލޫފް މިއަދު ކުރެއްވި ޓްވީޓެއްގައި ވިދާޅުވީ މާޒިން އަކީ މުޅި ގައުމަށް ހުރި ނަމޫނާއެއް ކަމަށާއި ބުރަކޮށް މަސައްކަތްކޮށްފިނަމަ އެއްވެސް ކަމަކީ ހާސިލުނުކުރެވޭނެ ކަމެއް ނޫންކަން މާޒިން ސާބިތުކޮށްދީފައިވާ ކަމަށެވެ.
ލޯ މެޑަލް އާއެކު ރާއްޖޭގެ ތާރީހީ ސޮފްހާތަކުން މާޒިން އަށް ޖާގަ ލިބިގެން ގޮސްފައިވާ ކަމަށާއި، މާޒިން އަށް މެޑަލް ހަވާލުކުރަން ފުރުސަތު ލިބުމަކީ ލިބުނު ޝަރަފެއް ކަމަށްވެސް މިނިސްޓަރު ވިދާޅުވިއެވެ.
Thanks Mazin for inspiring a nation. You’ve proved that nothing is impossible with hard work & dedication. You’ve sealed a place in history books with this medal & I know this is the first of many. Honored to have presented the medals to Mazin & other differently abled athletes. pic.twitter.com/S9QdryKhjK
— Ahmed Mahloof (@AhmedMahloof) July 23, 2019
މޮރިޝަސްގައި މިހާރު ކުރިއަށްދާ އައިއޯއައިޖީގައި މާޒިން ހޯދި ލޯ މެޑަލްއާއެކު ރާއްޖެ އަށް މިހާތަނަށް ވަނީ ފަސް މެޑަލް ލިބިފައެވެ. އޭގެތެރޭގައި ރާއްޖޭގެ ގައުމީ އަންހެން ޓޭބަލް ޓެނިސް ޓީމުން ހޯދި ރަން މެޑަލް ވެސް ހިމެނެއެވެ.