ތ.ވޭމަންޑޫގައި އަޟްހާ އީދުގެ މުނާސަބަތުގައި ކުލަ ޖެހުމުގެ ހަރަކާތުގެ ތެރެއިން އަންހެނަކާ ބަދުއަހުލާގީ އަމަލު ހިންގި މައްސަލައެއް ފުލުހުން ބަލަން ފަށައިފިއެވެ.
ފުލުހުންގެ މީޑިޔާ އޮފިޝަލް ވިދާޅުވީ މި ހާދިސާ ހިނގާފައިވަނީ މިއަދު މެންދުރު 14:50 ހާއިރު ކަމަށާއި 19 އަހަރުގެ އެ އަންހެން މީހާއާ މެދު ބަދަ އަހުލާގީ އަމަލު ހިންގި ކަމަށް ތުހުމަތު ކުރެވެނީ 31 އަހަރުގެ ފިރިހެނަކަށް ކަމަށެވެ.
މި ހާދިސާ ފުލުހުންނަށް ރިޕޯޓުކޮށްފައިވަނީ މިރޭ 19:50 ހާއިރު ކަމަށްވެސް އޮފިޝަލް ވިދާޅުވިއެވެ.
މި މައްސަލަ ވޭމަންޑޫ ޕޮލިސް ސްޓޭޝަނުގެ ފަރާތުން ގަވާއިދާ އެއްގޮތްވާ ގޮތުގެ މަތިން ތަހުގީގު ކުރަމުންދާ ކަމަށްވެސް އޮފިޝަލް ވިދާޅުވިއެވެ.