ކުރިއަށް އޮތް ލޯކަލް ކަައުންސިލް އިންތިހާބުގެ ކަންކަން އިތުރަށް ކުރިއަށް ގެންދާނެ ގޮތާ ބެހޭގޮތުން އިލެކްޝަންސް ކޮމިޝަންގެ ނިންމުން މިއަދު އިއުލާން ކުރާނެކަމަށް އެ ކޮމިޝަނުން ބުނެފިއެވެ.
އިލެކްޝަންސް ކޮމިޝަނުގެ ނައިބު ރައީސް އަހުމަދު އަކްރަމް ކުރެއްވި ޓްވީޓެއްގައި ވިދާޅުވީ ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިޚާބު އިތުރަށް ކުރިއަށް ގެންދާނެ ގޮތާ މެދު އެ ކޮމިޝަނުން ގައުމީ ލަފާ ދޭ ކޮމެޓީއާ އެކު މަޝްވަރާކޮށްފައިވާ ކަމަށެވެ.
އެގޮތުން އެކަމާ މެދު އެ ކޮމިޝަނުގެ ނިންމުން މިއަދު އިއުލާންކުރާނެ ކަމަށާއި އަދި ހާލަތު ބަދަލުކުރެވޭނީ އެންމެން އެކުގައި މަސައްކަތް ކޮށްގެން ކަމަށް ވެސް އަކްރަމް ވިދާޅުވިއެވެ.
#LCE2020 adhi #WDC2020 aai medhu ithurah kuriyah dhaane gothakaai medhu mashvaraa kurumah miadhu beynuvunu NAC meeting ge therein, IA EC ge nimmun Maadhan iulaan kuraanan, haalathu badhalukureveyni ehme ekugai thedhuvegen, pic.twitter.com/KVdobzdHJp
— Ahmed Akram (@akram4535) March 14, 2020
އަންނަ މަހުގެ އެއްވަނަ ދުވަހު ބޭއްވުމަށް ހަމަޖެއްސި ކައުންސިލް އިންތިހާބު މިހާރު ވަނީ އަންނަ މަހުގެ 18 ވަނަ ދުވަހަށް ފަސްކޮށްފައެވެ. މި ތާރީހު ދެން އިތުރަށް ފަސްކުރެވޭނީ ކޯޓު އަމުރަކުން ނުވަތަ މަޖިލީހުން ފާސްކުރާ ގާނޫނަކުން ކަމަށް އިލެކްޝަންސް ކޮމިޝަނުން ބުނެއެވެ.
އީސީގެ ރައީސް އަހުމަދު ޝަރީފް ވިދާޅުވީ އިންތިހާބު ފަސްކުރަން ނިންމީ ރާއްޖޭގައި 30 ދުވަހަށް ސިއްހީ ކުއްލި ނުރައްކަލުގެ ހާލަތު އިއުލާން ކުރެއްވުމާ ގުޅިގެން ކަމަށެވެ.
އަދި ސިއްހީ ކުއްލި ނުރައްކަލުގެ ހާލަތު އިތުރުކޮށްފިނަމަ، އަދި އިންތިހާބު މިހާރު ބާއްވަން ނިންމާފައިވާ ތާރީހު އެ މުއްދަތުގެ ތެރެއަށް ވަންނަނަމަ، ކޯޓަށް ގޮސްގެން އެކަމަށް ހައްލެއް ހޯއްދަވާނެ ކަމަށްވެސް ޝަރީފް ވިދާޅުވިއެވެ.