ކޮވިޑް-19 އާއި ގުޅިގެން ސައުދީ އަރަބިއްޔާގެ ޖިއްދާ ވެސް ލޮކްޑައުންކޮށްފިއެވެ.
ސައުދީ ޕްރެސް އެޖެންސީން ރިޕޯޓުކޮށްފައިވާ ގޮތުގައި ޖިއްދާ އަށް ވަދެ ނިކުމެވޭ ހުރިހާ ބޯޑަރެއް ބަންދުކޮށް، އެގައުމުގެ ގަޑިން މިއަދު މެންދުރު 3:00 އިން ފެށިގެން ކާފިއު ހިންގުމަށް ވަނީ ހަމަޖެހިފައެވެ.
މީގެކުރިން ސައުދީ ސަރުކާރުން ވަނީ މުސްލިމުންގެ މުގައްދަސް ދެ ބިން ކަމުގައިވާ މައްކާ އާއި މަދީނާ އަދި ސައުދީ އަރަބިޔާގެ ވެރިރަށް ރިޔާދު ވެސް ލޮކްޑައުންގެ ހާލަތަށް ގެނެސްފައެވެ.
މިއީ ކޮވިޑް-19 ސައުދީގައި ފެތުރުން ހުއްޓުވުމަށްޓަކާ އެޅި ފިޔަވަޅެކެވެ. ސައުދީން މީގެކުރިން ވަނީ އެގައުމުގެ އެތެރޭ އުދުހުންތަކާއި، އެއްގަމު ދަތުރުފަތުރުވެސް ވަނީ މަނާކޮށްފައެވެ.
ސައުދީން ކޮވިޑް-19 ޖެހިފައިވާ 200 އަށްވުރެ ގިނަ މީހުން ފެނިފައިވާއިރު މި ބަލީގައި އެގައުމުން ވަނީ ތިން މީހަކު މަރުވެފައެވެ.