ތައިލޭންޑްގެ މައިނާ ހޮޓެލްސް ގްރޫޕުން ކޮވިޑް-19 އަށް ޓެސްޓު ކުރުމަށް ބޭނުންކުރާ، ޕީސީއާރް މެޝިނެއް ރާއްޖެ އަށް ހަދިޔާކޮށްފިއެވެ.
އިކޮނޮމިކް މިނިސްޓްރީން ބުނީ އެ ގްރޫޕުން ޕީސީއާރް މެޝިނެއްގެ އިތުރުން 100 ގެލޮންގެ ހޭންޑް ސެނިޓައިޒާ ވެސް ހަދިޔާކޮށްފައިވާ ކަމަށެވެ. މި ތަކެއްޗަކީ ކޮވިޑް އާއި ދެކޮޅަށް ރާއްޖެއިން ކުރަމުންދާ މަސައްކަތަށް މުހިއްމު ތަކެތިކަން މިނިސްޓްރީން ފާހަގަކުރެއެވެ.
The Government of Maldives is very thankful to Minor Hotel Group for generously donating a PCR machine and 100 gallons of hand sanitizer, which are critical medical equipments required in the Maldives’ effort to combat the current COVID-19 pandemic.@AnantaraMaldive @faya_i
— Economy & Trade (@MoEDmv) May 22, 2020
ހޮސްޕިޓާލިޓީ ދާއިރާގައި ފާހަގަކޮށްލެވޭ މައިނާ ހޮޓެލްސް ގްރޫޕުން އަންނަނީ ދުނިޔޭގެ 55 ގައުމެއްގައި 537 ހޮޓެލް މިހާރުވެސް އޮޕަރޭޓް ކުރަމުންނެވެ. އެ ކުންފުނިން ރާއްޖޭގައި ހިންގާ ތަންތަނުގެ ތެރޭގައި އަނަންތަރާ މޯލްޑިވްސް ރިސޯޓު ހިމެނެއެވެ.
ކޮވިޑަށް ޓެސްޓު ކުރުމުގެ ކަންކަން ރާއްޖޭގައި މިހާރު ކުރަމުން އަންނަނީ އައިޖީއެމްއެޗާއި ފުލުހުންގެ ލެބުގައެވެ. އަދި އާދީއްތަ އިން ފެށިގެން އޭޑީކޭ ހޮސްޕިޓަލުގައި ވެސް ކޮވިޑަށް ޓެސްޓު ކުރުމުގެ ކަންކަން ފެށުމަށް ވަނީ ނިންމާފައެވެ.
މައިނާ ހޮޓެލް ގްރޫޕުން ޕީސީއާރް މެޝިނެއް ރާއްޖެ އަށް ހަދިޔާކޮށްފައިވާއިރު، ވެލާ ރިސޯޓުގެ އޯނަރުން ކަމަށްވާ ޗެކް ރިޕަޕްލިކަށް ނިސްބަތްވާ ޖިރީ ސްމެކް އާއި ޑެނިއަލް ކްރެޓިންސްކީގެ ފަރާތުން ރާއްޖެއަށް ވަނީ 10،000 ޓެސްޓު ކިޓާއި، 5 ވެންޓިލޭޓަރާއި، 10،000 ފޭސް މާސްކާއި 200 ރެސްޕިރޭޓަރާއި 500 ޕީޕީޓީ ކިޓް ހަދިޔާކޮށްފައެވެ.
މީގެއިތުރުން ސިންގަޕޫރުގެ ހޮޓެލް ޕްރޮޕަޓީސް ލިމިޓެޑް (އެޗްޕީއެލް)ގެ އޯނަރު އަދި ބިލިއަނަރު އޮންގް ބެންގް ސެންގް ވަނީ ރާއްޖެ އަށް 15 ވެންޓިލޭޓަރު ހަދިޔާކޮށްފައެވެ. އަދި ސިންގަޕޫރުގެ އިތުރު ކުންފުންޏަކުން ރާއްޖެއަށް 5000 ޓެސްޓު ކިޓު ވެސް ވަނީ ހަދިޔާކޮށްފައެވެ.
ކޮވިޑް-19 އަށް ރާއްޖެއިން މިހާތަނަށް 1274 މީހުން ޕޮޒިޓިވް ވެފައިވާއިރު، 109 މީހަކު ބަލިން ރަނގަޅުވެ، ހަތަރު މީހަކު ވަނީ މަރުވެފައެވެ.