މީގެ 30 އަހަރު ކުރިން ލިވަޕޫލް އިން އިނގިރޭސި ލީގުގެ ތަށި ކާމިޔާބުކުރި ހުރިގޮތަށް، މިއަދު ވެސް ހުންނެވީ އެ ކްލަބާއެކު ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
30 އަހަރަށްފަހު ލިވަޕޫލް އިން ޕްރިމިއާ ލީގުގެ ޗެމްޕިއަންކަން މި ސީޒަނުގައި ހޯދިއިރު، ރޭ ލީގުގައި 5-3 އިން ޗެލްސީ ބަލިކުރުމަށްފަހު އެޓީމުން ވަނީ ލީގު ތަށި ރަސްމީކޮށް އުފުލާލާފައެވެ.
ލިވަޕޫލްގެ މި ކާމިޔާބީ ދުނިޔޭގެ އެކި ކަންކޮޅުތަކުގައި ތިބި އެޓީމުގެ ސަޕޯޓަރުުން ފާހަގަކުރަމުންދާއިރު، މައުމޫން ކުރެއްވި ޓްވީޓެއްގައި ވަނީ ލިވަޕޫލް އިން ހޯދި ކާމިޔާބީއާ ގުޅިގެން އެޓީމުގެ ކުޅުންތެރިންނާއި ކޯޗުގެ އިތުރުން އޮފިޝަލުންނަށް މަރުހަބާ ވިދާޅުވެފައެވެ.
އަދި މީގެ 30 އަހަރު ކުރިން ހުރިގޮތަށް މިއަދު ވެސް ލިވަޕޫލް އެކު ހުންނެވި ކަމަށް މައުމޫން ވަނީ ވިދާޅުވެފައެވެ.
Congratulations @LFC players, manager, coaching staff, club officials and fans across the globe on lifting the premiership trophy. I was there for you in 1990 and I am there for you now. #YNWA @OLSCMaldives @MRM_Office pic.twitter.com/EWDzF49Kut
— Maumoon Abdul Gayoom (@maumoonagayoom) July 23, 2020
ޕްރިމިއާ ލީގުގެ ޗެމްޕިއަންކަން ލިވަޕޫލް އިން ހޯދިއިރު، މިދިޔަ ސީޒަނުގައި އެޓީމުން ވަނީ ޗެމްޕިއަންސް ލީގާއި، ފީފާ ކްލަބު ވޯލްޑް ކަޕް ހޯދާފައެވެ. އަދި މި ސީޒަން ފެށުމުގެ ކުރިން ކުޅުނު ޔޫއެފާ ސުޕަ ކަޕް ވެސް ހޯދީ ލިވަޕޫލް އިންނެވެ.
ކައިރިކައިރީގައި ގިނަ ކާމިޔާބީތަކެއް ލިވަޕޫލް އިން ހޯދަމުން އަންނައިރު، އަންނަ އާދީއްތަ ދުވަހު ލީގުގައި ނިއުކާސަލް ޔުނައިޓެޑާއި ދެކޮޅަށް ކުޅޭ މެޗާއެކު އެޓީމަށް މި ސީޒަން ނިމޭނެއެވެ.