އިނގިރޭސިވިލާތުގެ ރައްޔިތުން ދަތުރުކުރުމަށް އެގައުމުން އެކުލަވާލި "ފަސޭހަ ގައުމުތަކުގެ" ލިސްޓުގައި އެންމެފަހުން ރާއްޖެ ހިމަނައިފިއެވެ.
އިނގިރޭސިވިލާތުގެ ސެކެޓްރީ އޮފް ސްޓޭޓް ފޯ ޓްރާންސްޕޯޓު ގްރާންޓް ޝެޕްސް މިރޭ ވިދާޅުވީ އެންމެފަހުން ލިބުނު ޑޭޓާ ތަކުގެ މައްޗަށް ބިނާކޮށް އެކުލަވާލި އެސެސްމެންޓަކަށްފަހު ޔޫކޭގެ ރައްޔިތުން ދަތުރުކުރުން ފަސޭހަ ގައުމުތަކުގެ ލިސްޓުގައި ކެނެރީ އައިލޭންޑްސް އާއި ރާއްޖެ އާއި ޑެންމާކް އަދި ގްރީކުގެ ޓޫރިސްޓް މަންޒިލް މައިކޯނޯސް ހިމެނުމަށް ނިންމާފައިވާ ކަމަށެވެ.
އެހެންކަމުން މި މަހުގެ 25 ވަނަ ދުވަހުން ފެށިގެން މި ގައުމުތަކުން އެނބުރި ޔޫކޭ އަށް އަންނަ ފަރާތްތަކުން ސެލްފް އައިސޮލޭޓް ވާން ނުޖެހޭނެ ކަމަށް އޭނާ ވިދާޅުވިއެވެ.
ޔޫކޭ ސަރުކާރުގެ މި ނިންމުމަށް ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވަނީ މަރުހަބާ ދަންނަވާފައެވެ.
It is my utmost pleasure to welcome this decision by the UK govt to include Maldives in its #TravelCorridors list. Naturally socially distanced islands allow the Maldives to be a safe & tranquil destination for all. We look forward to welcoming many more tourists from the UK. https://t.co/UW3N7Nidpo
— Abdulla Shahid (@abdulla_shahid) October 22, 2020
ކޮވިޑް-19 އާއި ގުޅިގެން ރާއްޖޭގެ ހާލަތު ގޯސްވުމަށްފަހު މިހާރު އަންނަނީ ހާލަތު ރަނގަޅުވަމުންނެވެ. އެގޮތުން މީގެކުރިން ދުވާލަކު 100 މީހަކު ކޮވިޑަށް ޕޮޒިޓިވްވި ނަމަވެސް އެ އަދަދު ވަނީ ވަރަށް ބޮޑަށް ދަށަށް ގޮސްފައެވެ. އެގޮތުން އިއްޔެ ރާއްޖެއިން މި ބައްޔަށް ޕޮޒިޓިވްވީ 45 މީހުންނެވެ.
މި ބައްޔަށް ރާއްޖެއިން ޖުމްލަ 11،000 އަށް ވުރެ ގިނަ މީހުން ޕޮޒިޓިވް ވެފައިވާއިރު، 36 މީހަކު ވަނީ ބަލީގައި ނިޔާވެފައެވެ.