އައްޑޫ ސިޓީ ގަމުގައި ފްލައިން ސްކޫލް ހިންގާ، ސްރީ ލަންކާގެ އޭޝިއަން އެކަޑެމީ އޮފް އެރޮނޯޓިކްސް (އޭއޭއޭ) ބޭރުކުރަން އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ގޮވާލައިފިއެވެ.
މައްސަލަ ބޮޑުވެފައިވާ އައްޑޫ ފްލައިން ސްކޫލްގެ މައްސަލައާ ގުޅިގެން ރޮޒެއިނާ ކުރެއްވި ޓްވީޓެއްގައި ވިދާޅުވީ ދިވެހި ފަސްގަނޑުގައި ތިބެގެން ދިވެހި ކިޔަވާ ކުދިންނަށް މުސީބާއި ޖެއްސުމުގެ ފުރުސަތު ދެވިގެން ނުވާނެ ކަމަށެވެ. އަދި އޭއޭއޭ ބޭރުކޮށްފައި އެހެން ގޮތެއް ހޯދަންޖެހޭ ކަމަށާއި ޖެއްސުން ކުރިޔަސް އޭއޭއޭ ގެ ކަންތައް ހުރީ ބޮޑުވަރު ހިސާބެއްގައި ކަމަށްވެސް ރޮޒެއިނާ ވިދާޅުވިއެވެ.
ފްލައިން ސްކޫލްގެ ދަރިވަރުންގެ ކަންބޮޑުވުންތަކަށް ޓްރާންސްޕޯޓު މިނިސްޓަރު އައިޝަތު ނަހުލާ ހައްލެއް ހޯދައިދިނުމަށްވެސް ރޮޒެއިނާ ވަނީ ގޮވާލާފައެވެ.
"ތި މިނިސްޓްރީ ތެރެއިން މި މީހުންނަށް ވާގިވެރިވާ ފަރާތެއް ހުރެގެން ކަމަށް ވަނީ މި މީހުންގެ ކަންތައް މާ މައްޗަށް ގޮސްގެން މި އުޅެނީ" ރޮޒެއިނާ ވިދާޅުވިއެވެ.
Dhivehinge fasganduga thibegen dhivehi kiyavaa kudhinnah museebaai jessumuge furusathu dhevigen nuvaane. Mimeehun beyru koffa ehen gotheh hoadhan eba jehey! Jessun kuriyas thu AAA ehge kanthah midhen bodu varu! https://t.co/4eSsPBNufu
— 𝐌𝐏 𝐑𝐨𝐳𝐚𝐢𝐧𝐚 𝐀𝐝𝐚𝐦 🎈 (@Roxeyna) December 11, 2020
ޓްރާންސްޕޯޓު މިނިސްޓްރީ އަށް މި މައްސަލަ ހައްލުކޮށްދެވެން ވާނެ ކަމަށާއި މިނިސްޓްރީ ތެރެއިން ފްލައިން ސްކޫލް ހިންގާ އޭއޭއޭ އަށް ވާގިވެރިވާ ބަޔަކަށް ފިޔަވަޅު އެޅުމަށް ވެސް ރޮޒެއިނާ ވަނީ ގޮވާލާފައެވެ.
ފްލައިން ސްކޫލްގައި ހުރި މައްސަލަތައް މީޑިއާ އިންނާއި ސޯޝަލް މީޑިއާގެ ޒަރިއްޔާ އިން ގިނަ ބައެއްގެ ސަމާލުކަމަށް އައިސްފައިވީ ނަމަވެސް އެ މައްސަލަތަކަށް އަދި މިހާތަނަށް އެއްވެސް ހައްލެއް އައިސްފައެއް ނުވެއެވެ. އޭގެ ބަދަލުގައި ދަރިވަރުންނަށް ކުރިމަތިކުރުވާ ފިއްތުންތައް އަންނަނީ ދުވަހަކަށް ދުވަހަކަށް ވުރެ ދުވަހެއް އިތުރުވަމުންނެވެ.
އެގޮތުން މިހާތަނަށް 20 އަށްވުރެ ގިނަ ދަރިވަރުން އެ ސްކޫލުން ވަކިކޮށްފައިވާއިރު، އެކި ދުވަސްމަތިން ދަރިވަރުންނަށް އަންނަނީ ވަކި މުއްދަތެއްގެ ތެރޭގައި ކޯސް ނިންމަންޖެހޭނެ ކަމަށް ބުނެ އިންޒާރުގެ މެއިލްތައް ވެސް ލިބެމުންނެވެ. މީގެއިތުރުން ސަރުކާރުގެ ވުޒާރާތަކުން އަންގާ އެންގުންތަކަށް ވެސް އޭއޭއޭ އިން އަންނަނީ ގޮންޖަހަމުންނެވެ.