ޓޫރިޒަމްގެ ދާއިރާ އިން ފާއިތުވި 38 އަހަރު ނާންނަވަރުގެ ކުރިއެރުން އައްޑޫ ސިޓީ އަށް ގެންނާނެ ކަމަށް ޓޫރިޒަމް މިނިސްޓަރު އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މައުސޫމް މިހެން ވިދާޅުވީ އައްޑޫގައި ފުރަތަމަ ފަހަރަށް ޓޫރިސްޓު ހޮޓަލެއް ހުޅުވިތާ 38 އަހަރު ފުރުމުގެ މުނާސަބަތާ ދިމާކޮށް ކުރެއްވި ޓްވީެއްގައެވެ. އެގޮތުން މައުސޫމް ވިދާޅުވީ ފާއިތުވި 38 އަހަރު ޓޫރިޒަމްގެ ދާއިރާ އިން ނާންނަވަރުގެ ކުރިއެރުން ކުރިއަށް އޮތް ފަސް އަހަރުތެރޭ އައްޑޫ އަށް ގެނެވޭނެ ކަމުގެ ޔަގީންކަން އެބައޮތް ކަމަށެވެ.
Today marks 38 years since the first tourist hotel #GanHolidayCamp opened in #Addu Atoll. I'm very confident that Insha Allah the next 5 years will bring more progress to Addu City #tourism than it did in the past 38 years.@AdduCityCouncil #Maldives#VisitSouthernMaldives
— Abdulla Mausoom (@Mausoom_Maus) February 22, 2021
މައުސޫމް މިހެން ވިދާޅުވިއިރު މިއަހަރުގެ ދުނިޔޭގެ ފަތުރުވެރިކަމުގެ ދުވަހުގެ މައި ހަރަކާތްތައް އައްޑޫގައި ބޭއްވުމަށް ވަނީ ނިންމާފައެވެ.
ބްރިޓިޝް ލޯޔަލްޓީ ފައްތާލިތާ 75 އަހަރު ފުރޭ އަލިމަސް ޔޫބިލް ފާހަގަކުރުމަށް އައްޑޫގައި ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ވަނީ މިވަގުތު ބަންދުކޮށްފައިވާ އައްޑޫގެ ދެ ރިސޯޓު ކަމަށްވާ ކެނަރީފް އަދި ޝަންގްރިއްލާ ރިސޯޓު އަލުން ހުޅުވުމުގެ މަސައްކަތާއި ގަން އިންޓަނޭޝަނަލް އެއާޕޯޓަށް ބޯޓު ޖެއްސޭނެ އިންތިޒާމު ވެސް ހަމަޖައްސަމުންދާ ކަމަށާއި މިކަން ކާމިޔާބު ވާނީ މި ދެ ކަންތައް ވެސް އެކު އެކީގައި ކޮށްގެން ކަމަށްވެސް ވިދާޅުވެފައެވެ.
އެގޮތުން 2022 ވަނަ އަހަރަކީ ފަތުރުވެރިކަމުގެ ރަން އަހަރު ކަމަށްވާއިރު، އެ އަހަރަށް މަރުހަބާ ކިޔާއިރު އައްޑޫ ސިޓީގައި ފަތުރުވެރިކަމުގެ ދާއިރާގައި ހަރަކާތްތެރިވާ އެންމެންގެ މޫނަށް ހިނިތުވުންވުމުގެ ކުލަވަރު ގެނެސްދޭނެ ކަމަށްވެސް މައުސޫމް ވިދާޅުވިއެވެ. އެ ދެ ރިސޯޓު އަލުން ހުޅުވޭނެ ތާރީހެއް ދަންނަވަން ދަތި ނަމަވެސް މިއަހަރުތެރޭ އެ ދެތަން އަނބުރާ ވުޖޫދަށް ގެންނާނެ ކަމަށް މިނިސްޓަރު ވިދާޅުވިއެވެ.