ސްރީ ލަންކާ އަށް މިހާރު ދިމާވެފައި އޮތް މާލީ އަދި އިގުތިސާދީ ހާލަތުން އަރައިގަތުމަށްޓަކައި މިހާތަނަށް ހަރުދަނާ ފިޔަވަޅުތަކެއް އަޅަމުން ނުދާތީ ވޯލްޑް ބޭންކުން އެ ގައުމަށް އިތުރަށް މާލީ އެހީ ނުދޭން ނިންމައިފި އެވެ.
މިކަން އިއުލާންކޮށް ބުނީ ލަންކާ އިން މައިކްރޮ އިކޮނޮމިކް ޕޮލިސީ ހަރުދަނާކޮށް އެކަމަކުގެ އާ ފްރޭމްވޯކް ރިސްޓްރަކާ ވެސް ކުރަން ޖެހޭނެ ކަމަށެވެ. ނަމަވެސް ގައުމުގެ އިގުތިސާދު ހަމައަކަށް އެޅުވުމަށްޓަކައި މިހާތަނަށް ގަބޫލުކުރެވޭ ވަރުގެ ހަރުދަނާ ފިޔަވަޅުތަކެއް އެޅިފައި ނުވާ ކަމަށް ބުންޏެވެ. އެހެންވެ އެކަމާ ވަރަށް ކަންބޮޑުވާ ކަމަށާއި ލަންކާގެ އިގުތިސާދީ ހާލަތު ރަނގަޅުކުރުމަށްޓަކައި ޕޮލިސީތައް އެކުލަވާލައި އެކަމަށް ޒިންމާދާރ މަސައްކަތްތަކެއް ވަރަށް ބޮޑަށް ކުރަން ޖެހިފައިވާ ކަމަށް ވޯލްޑް ބޭންކުން ބުންޏެވެ.
🔴 Until adequate macroeconomic policy framework is in place @WorldBank DOES NOT plan to offer new financing to #lka.
🔴 Currently repurposing previously approved project resources to help GoSL w/essential meds, cash transfers/meals for poor + support for farmers and small biz.
— Roel Raymond (@roelraymond) May 25, 2022
އެގޮތުން މިހާރު އޮތް ހާލަތު އަރައިގަތުމާއި މުސްތަގުބަލުގައި މިފަދަ ހާލަތަކަށް ގައުމު ނުވެއްޓޭނެ ފަދަ އިގުތިސާދީ ރޭވުންތެރިން ކަމެއް ލަންކާ އަށް ބޭނުންވާ ކަމަށް ބުންޏެވެ.
ވޯލްޑް ބޭންކުން ބުނި ގޮތުގައި ލަންކާ އަށް ބޭނުންވާ އަސާސީ ތަކެތި ކަމަށްވާ ބޭހާއި ގޭހާއި ގަސްކާނާ އާއި ދަރިވަރުންގެ ނާސްތާ ގެ އިތުރުން ގަފީރު އާއިލާތަކަށް އެހީވާން ވެސް މިހާތަނަށް މާލީ ގޮތުން ބޮޑެތި އެހީތަކެއް ދީފައިވާނެ އެވެ. އެކަމަކު އެގޮތަށް ދީފައިވާ ފައިސާ ވެސް އެންމެ ރަނގަޅު ގޮތުގައި ހޭދަކުރެވިފައި ނުވާ ކަމަށް ބުންޏެވެ.
Sri Lanka immediately needs political reforms. Address the political situation before economic.
— Imraz Aniff (@AniffImraz) May 25, 2022
އެހެންވެ ގައުމު ދަރަނި ވެސް ބޮޑުވެފައިވާ ގައުމަށް މި ވަގުތު މާލީ އެހީ ނުދޭން ނިންމި ނަމަވެސް ލަންކާގެ ހާލަތު ގާތުން ބަލައި ވަޒަންކުރުމާއި އަދި ކަމާ ގުޅުން ހުރި އިދާރާތަކުން ކުރާ މަސައްކަތްތައް ވެސް ބަލަމުން އަންނާނެ ކަމަށް ވޯލްޑް ބޭންކުން ބުންޏެވެ.
މި އަހަރުގެ ކުރީކޮޅުން ފެށިގެން 22 މިލިއަންް މީހުންގެ އާބާދީއެއް އޮތް ލަންކާ ބޮޑު ތަދުމަޑުކަމެއްގެ ތެރޭގައި އޮތް އިރު، އެ ގައުމުގެ ސިޔާސީ މަސްރަހު ވެސް އޮތީ ދުނިޔޭގެ މާލީ އިދާރާތަކުން ކަންބޮޑުވާ ފަދަ ހާލަތެއްގަ އެވެ.