އެޕޯލޯ 11 ގައި މީގެ 54 އަހަރު ކުރިން ހަނދަށް ކުރި ދަތުރުގައި ބައިވެރިވި އެމެރިކާގެ އެސްޓްރޮނޯޓެއް ކަމަށްވާ ބަޒް އަލްޑްރިން 93 އަހަރުގައި އިތުރު ކައިވެންޏެއްކޮށްފި އެވެ.
އެންމެ ފުރަތަމަ 1969 ގައި ހަނދަށް ދިޔަ ނީލް އާމްސްޓްރޯންގްގެ ފަހުން އެ ޝަރަފު ލިބުނު ދެވަނަ މީހާގެ ގޮތުގައި ތާރީހުން ޖާގަ ހޯދި ދުވަސްވީ އެސްޓްރޮނޯޓް މި ފަހަރު ކައިވެނިކުރީ ކެމިކަލް އިންޖިނިއަރެއް ކަމަށްވާ ޑރ. އަންކާ ފައުރް، 63، އާ އެވެ.
އެ ދެ މީހުންގެ ކައިވެނީގެ ހަފުލާ ބޭއްވީ ހުކުރު ދުވަހު ލޮސް އެންޖެލިސްގަ އެވެ. އެ ހަފުލާގެ ފޮޓޯތަކެއް ވެސް ބަޒް ޓްވީޓްކޮށް ކައިވެނިކުރި ވާހަކަ ހިއްސާކޮށްފައިވެ އެވެ.
On my 93rd birthday & the day I will also be honored by Living Legends of Aviation I am pleased to announce that my longtime love Dr. Anca Faur & I have tied the knot.We were joined in holy matrimony in a small private ceremony in Los Angeles & are as excited as eloping teenagers pic.twitter.com/VwMP4W30Tn
— Dr. Buzz Aldrin (@TheRealBuzz) January 21, 2023
އޭގައި އޭނަ ބުނީ 93 ވަނަ އުފަން ދުވަހު ކައިވެނި ކުރެވުމަކީ ވަރަށް ބޮޑު އުފަލެއް ކަމަށާއި އަންހެނުން އަންކާ އަކީ އޭނަގެ ދުވަސްވީ ބައިވެރިއެއް ކަމަށެވެ. ޑރ. އަންކާ އަކީ ބަޒްގެ ކުންފުނި، ބަޒް އަލްޑްރިން ވެންޗާސްގެ އެގްޒެކެޓިވް ވައިސް ޕްރެޒިޑެންޓެވެ.
ބަޒް އެންމެ ފުރަތަމަ 1954 ގައި ކައިވެނިކުރީ ޖޮއާން އާޝާއާ އެވެ. އޭގެ ފަހުން އޭނަ 1975 ގައި ކައިވެނިކުރީ ބެވަލީ ވޭން ޒިލީއާ އެވެ. އަދި ތިން ވަނަ ކައިވެނި ލޮއިޒް ޑްރިގްސް ކެނަންއާ ކުރީ 1988 ގަ އެވެ. އެ ތިން މީހުން ވެސް މިހާރު ދުނިޔެއަކު ނެތެވެ. ބަޒް އަށް ތިން ދަރިން ލިބިފައިވެ އެވެ. އެއީ ޖޭމްސް އަލްޑްރިން، 67، އާއި، ޖެނިސް އަލްޑްރިން، 61، ގެ އިތުރުން އެންޑްރޫ އަލްޑްރިން އެވެ. މި ތިން ދަރިން ލިބުނީ ބަޒްގެ ފުރަތަމަ ކައިވެންޏަށެވެ.
ބަޒް އަކީ އެޕޯލޯ 11 ގެ ފަޅުވެރިންގެ ތެރެއިން ދުނިޔޭގައި ހުރި ހަމައެކަނި މީހާ އެވެ. އެ ދަތުރުގެ ފަޅުވެރިންނަކީ ނީލް އާމްސްޓްރޯންގް އާއި ބަޒްގެ އިތުރުން މައިކަލް ކޮލިންސް އެވެ. މައިކަލް ވަނީ 91 އަހަރުގައި 2021 ގައި މަރުވެފަ އެވެ. އަދި ނީލް އާމްސްރޯންސްގް 82 އަހަރުގައި މަރުވީ 2012 ގަ އެވެ.