ޖުމްހޫރީ ޕާޓީގެ ލީޑަރު ގާސިމް އިބްރާހިމް ޖަމިއްޔަތުއްސަލަފުގެ އިސް ބޭފުޅުންނާ ބައްދަލު ކުރައްވާ މަޝްވަރާ ކުރައްވައިފި އެވެ.
މި ބައްދަލުވުމާ ގުޅޭ ތަފްސީލެއް ހާމަކޮށްފައި ނުވާއިރު މިއީ ގާސިމްގެ ދައުވަތަކަށް ބޭއްވި ބައްދަލުވުމެއް ކަމަށް މައުލޫމާތު ލިބިފައިވެ އެވެ.
ގާސިމާއެކު މި ބައްދަލުވުމުގައި ޖޭޕީގެ ފަރާތުން ބައިވެރިވެވަޑައިގެންނެވީ ޑެޕިއުޓީ ލީޑަރު އަމީން އިބްރާހިމާއި ގާސިމްގެ އެޑްވައިޒަރު އަހްމަދު ނިހާން ހުސައިން މަނިކާއި ކުރީގެ ހޯމް މިނިސްޓަރު އަޒްލީން އަހުމަދާއި އެ ޕާޓީގެ ކައުންސިލްގެ މެންބަރު މޫސާ ނިޒާރު އިބްރާހިމް އެވެ.
JP Leader Hon @qasimibrahim @JAMIYYATHSALAF bahdhalu kurehvun pic.twitter.com/vu9tyGMD2s
— JP Secretariat (@JPSecretariat) March 20, 2023
ސަލަފުގެ ފަރާތުން އެ ޖަމިއްޔާގެ ރައީސް އައްޝައިހް އަބްދުﷲ ބުނު މުހައްމަދު އިބްރާހިމް އާއި ނާއިބު ރައީސް އައްޝައިހް އަހްމަދު ސަމީރު އާއި އިލްމުވެރީންގެ މަޖިލީހުގެ މެންބަރު ޑރ. އަލީ ޒާހިރު ބިން ސައީދު ގާސިމް އާއި އައްޝައިހް އަބްދުއްސަލާމް ދާއޫދް ބައިވެރިވެވަަަޑައިގެންނެވި އެވެ.
ސަލަފުން މީގެކުރިން ވަނީ މިއަހަރުގެ ބާއްވާ ރިޔާސީ އިންތިހާބާ ގުޅޭގޮތުން އިދިކޮޅު ޕީޕީއެމް-ޕީއެންސީ ކޯލިޝަނުގެ ބޭފުޅުންނާއި އެމްއެންޕީއާ ބައްދަލުކޮށް މަޝްވަރާކޮށްފަ އެވެ.
އެންމެފަހުން ބޭއްވި ރިޔާސީ އިންތިހާބުގައި ޖަމިއްޔަތުއްސަލަފުން ތާއީދުކޮށްފައިވަނީ ޕީޕީއެމްގެ ރިޔާސީ ކެންޑިޑޭޓް އަދި އޭރުގެ ރައީސް އަބްދުﷲ ޔާމީނަށެވެ.