މިހާރު "އެކްސް" ގެ ނަމުގައި ހިންގަމުން އަންނަ ކުރީގެ ޓްވިޓާ ބޭނުންކުރާ މީހުންގެ އަތުން ފީއެއް ނަގަން ނިންމުމާ ގުޅިގެން ދެ ގައުމެއްގައި މިކަން ޓެސްޓްކުރަން ފަށައިފި އެވެ.
އެގޮތުން އަހަރަކު ޑޮލަރެއްގެ ފީއެއް ދައްކަން ޖެހޭ ގޮތަށް މިކަން އެންމެ ފުރަތަމަ އިއްޔެ އިން ފެށިގެން ޓެސްޓްކުރަން ފެށި ދެ ގައުމަކީ ފިލިޕީންސާއި ނިއު ޒީލެންޑެވެ. މިކަން ޓެސްޓްކުރަން ފެށީ "ނޮޓް އަ ބޮޓް" ގެ ނަމުގަ އެވެ. މި ބަދަލާ އެކީ "އެކްސް" އާ އަލަށް ގުޅޭ ޔޫޒަރުންނަށް ޕޯސްޓްކޮށް، ލައިކްކޮށް، ރިޕްލައިކޮށް، ރީޕޯސްޓްކޮށް، އަދި އެހެން އެކައުންޓްތައް ކޯޓްކުރުމުގެ އިތުރަށް ބުކްމާކް ކުރެވޭނީ ފީ ދައްކައިގެންނެވެ. "އެކްސް" އަލަށް ބޭނުންކުރާ މީހުންނަށް ފީއާ ނުލައި ކުރެވޭނެ ކަންކަމަކީ ހަމައެކަނި ޕޯސްޓް ކިޔާލުމާއި ވީޑިއޯތައް ބަލާލުމާއި އެކައުންޓްތައް ފޮލޯކުރުމެވެ.
Correct, read for free, but $1/year to write. It’s the only way to fight bots without blocking real users.
This won’t stop bots completely, but it will be 1000X harder to manipulate the platform.
— Elon Musk (@elonmusk) October 18, 2023
ފީ ނެގުން ދެ ގައުމެއްގައި ޓެސްޓްކުރަން އިއްޔެ ފެށި ނަމަވެސް މިހާރު "އެކްސް" ބޭނުންކުރާ އެހެން ޔޫޒަރުންނަށް މިކަމުގެ އަސަރެއް ނުކުރާނެ ކަމަށް "އެކްސް" އިން ބުންޏެވެ. މިކަމާ ބެހޭ އިތުރު މައުލޫމާތު ފަހުން ހިއްސާކުރާނެ ކަމަށް ވެސް އެ ކުންފުނިން ބުނެފައިވެ އެވެ.
"އެކްސް" ބޭނުންކުރާ އެންމެންގެ އަތުން ފީއެއް ނެގުމުގެ ވިސްނުން ގެންގުޅުއްވާ ކަމަށް މީގެ މިހާރުގެ ވެރިޔާ މަހުޖަނު އީލޮން މަސްކް ވިދާޅުވީ މިދިޔަ މަހުގެ މެދު ތެރޭގަ އެވެ. އޭނަ ވިދާޅުވި ގޮތުގައި މި ބަދަލު ގެންނަ މައިގަނޑު ބޭނުމަކީ ބޮޓް އެކައުންޓްތަކުގެ މައްސަލަ އަށް އެކަށީގެންވާ ހައްލެއް ހޯދުމެވެ.
އެގޮތުން އާންމު އުސޫލެއްގެ ގޮތުން "އެކްސް" ބޭނުން ކުރަން ފީއެއް ނަގަން ފެށުމުން ބޮޓް އެކައުންޓްތަކުގެ މައްސަލަ އަށް އެދެވޭ ހައްލެއް އައިސް އެފަދަ އެކައުންޓްތަކުން މުއާމަލާތްކުރުން ވަރަށް ބޮޑު ދައްޗަކަށް ވާނެ ކަމަށް އިލޮން އިއްޔެ ވިދާޅުވެފައިވެ އެވެ.