އިއްޔެ ބޭއްވި ރައްޔިތުންގެ މަޖިލިސް އިންތިހާބުގައި ވެރިކަން ކުރާ ޕީއެންސީން ހޯދި ބޮޑު ކާމިޔާބީން ދިވެހިންގެ އުންމީދުތަކަކީ ކޮބައިކަން ސާފުވެއްޖެ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.
އޭނަ ސޯޝަލް މީޑިއާ ޕޯސްޓެއްގައި މިއަދު ވިދާޅުވީ ދިވެހިންގެ އުއްމީދުތައް ސާފުވެއްޖެ ކަމަށާއި ބައިބައިވުމާއި ފިތުނަ ފަސާދަ އާއި ސިޔާސީ ހަމަނުޖެހުން ދިވެހިން ބޭނުން ނުވާ ކަމަށެވެ.
"ދިވެހިން އެދެނީ ޤާނޫނު ނަގަހައްޓަން. ދިވެހިން އެދެނީ ހަމަޖެހުމާއި ރައްކާތެރިކަން. ދިވެހިން އެދެނީ މަސްތުވާ ތަކެތިން ސަލާމަތްވާން. ދިވެހިން އެދެނީ ވައްކަމާއި ކޮރަޕްޝަނުން މިންޖުވާން،" އިހުސާން ވިދާޅުވި އެވެ. "ދިވެހިން އެދެނީ ޒަމާނީ ތަރައްޤީ އާއި ފަރުދީ ތަނަވަސްކަން."
ޝުކުރިއްޔާ ދިވެހިން! ދިވެހީންގެރާއްޖެއަށް މަރުހަބާ. ދިވެހިންގެ އުއްމީދުތައް ސާފު. ބައިބައިވުމާއި ފިތުނަ ފަސާދައާއި ސިޔާސީ ހަމަނުޖެހުން ބޭނުމެއްނުވޭ. ދިވެހިން އެދެނީ ޤާނޫނު ނަގަހައްޓަން. ދިވެހިން އެދެނީ ހަމަޖެހުމާއި ރައްކާތެރިކަން. ދިވެހިން އެދެނީ މަސްތުވާ ތަކެތިން ސަލާމަތްވާން.…
— Minister of Homeland Security & Technology (@min_mohst) April 22, 2024
މިނިސްޓަރު ވިދާޅުވީ ކުރިއަށް އޮތް ފަސް އަހަރު ރައީސް ޑރ. މުހައްމަދު މުއިއްޒު ކުރައްވާނީ އެ މަސައްކަތް ކަމަށެވެ.
އިއްޔެ ބޭއްވި 20 ވަނަ މަޖިލިސް އިންތިހާބުގައި 93 ދާއިރާގެ ތެރެއިން 70 އަށް ވުރެ ގިނަ ދާއިރާ ޕީއެންސީން ވަނީ ކާމިޔާބުކޮށްފަ އެވެ. އިންތިހާބު ކާމިޔާބު ކުރެއްވި މެންބަރުންގެ ތެރޭގައި އިހުސާންގެ ބައްޕަ ފޭދޫ ދެކުނު ދާއިރާގެ ގޮނޑި ހޯއްދެވި އިބްރާހީމްދީދީ (އައިބީ) ވެސް ހިމެނިވަޑައިގަނެ އެވެ.