އެމްޑީޕީގެ ރައީސް އަބްދުﷲ ޝާހިދުގެ ބައްޕާފުޅު މޫސާ ޖަމީލްގެ ޖަނާޒާގެ ކަންކަން ފުރިހަމަ ކުރުމުގައި ސަރުކާރުގެ އިދާރާތަކުން ކުރެއްވި އިންތިޒާމުތައް ފާހަގަކޮށް، ރައީސް ޑރ. މުހައްމަދު މުއިއްޒަށް ޝުކުރު ދަންނަވައިފި އެވެ.
ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ ބައްޕާފުޅު އަވަހާރަވުމާ ގުޅިގެން ރައީސްގެ ތަޢުޒިޔާގެ މެސެޖްގައި ފާޅުކުރައްވާފައިވާ ހިތްޕުޅުހެޔޮ ޝުޢޫރުތަކަށް ޢާއިލާގެ ފަރާތުން އިޚްލާޞްތެރިކަމާއެކު ޝުކުރު ދަންނަވާ ކަމަށެވެ.
"ޢާއިލާއަށް ދިމާވި ނުހަނު ހިތްދަތި މިދަނޑިވަޅުގައި މަނިކުފާނުގެ އިރުޝާދުގެ މަތިން ބައްޕަގެ ޖަނާޒާގެ ކަންކަން ފުރިހަމަ ކުރުމުގައި ސަރުކާރުގެ އިދާރާތަކުން ކުރެއްވި އިންތިޒާމުތަކަށް ވެސް ޝުކުރު ދަންނަވަން،" ޝާހިދު ވިދާޅުވި އެވެ.
މަނިކުފާނުގެ ތަޢުޒިޔާގެ މެސެޖްގައި ފާޅުކުރައްވާފައިވާ ހިތްޕުޅުހެޔޮ ޝުޢޫރުތަކަށް އަޅުގަނޑާއި ޢާއިލާގެ ފަރާތުން އިޚްލާޞްތެރިކަމާއެކު ޝުކުރު ދަންނަވަން.
ޢާއިލާއަށް ދިމާވި ނުހަނު ހިތްދަތި މިދަނޑިވަޅުގައި މަނިކުފާނުގެ އިރްޝާދުގެ މަތިން ބައްޕަގެ ޖަނާޒާގެ ކަންކަން ފުރިހަމަ ކުރުމުގައި… https://t.co/FAoDgkuhvK
— Abdulla Shahid (@abdulla_shahid) April 24, 2024
ޝާހިދުގެ ބައްޕާފުޅު އަވަހާރަވީ މިއަދު ހެނދުނުގެ ވަގުތެއްގަ އެވެ. ކަށުނަމާދު ކުރިއަށް ގެންގޮސްފައިވަނީ އަސުރު ނަމާދަށްފަހު އިސްލާމީ މަރުކަޒުގަ އެވެ. ކަށު ނަމާދުގައި ކުރީގެ ރައީސް އިބްރާހިމް މުހައްމަދު ސޯލިހާއި ގިނަ އަދަދެއްގެ އާންމުން ބައިވެރިވި އެވެ.
ޝާހިދުގެ ބައްޕާފުޅު އަވަހާރަވުމުން ރައީސް މުއިއްޒު، ނައިބު ރައީސް ހުސައިން މުހައްމަދު ލަތީފް، ކުރީގެ ރައީސް ސޯލިހް، ކުރީގެ ނައިބުރައީސް ފައިސަލް ނަސީމް އަދި ސިޔާސީ އިސްފަރާތްތަކުން ވަނީ ތައުޒިޔާ ވިދާޅުވެފަ އެވެ.
ޝައިހް މޫސާ ޖަމީލު ދީދީއަކީ ރާއްޖޭގައި ކުރިން ރަސްކަން ކުރި ހުރަވީ ދަރިކޮޅުގެ ބޭފުޅުންގެ ތެރެއިން އެންމެ ފަހުން ދުނިޔޭގައި ހުންނެ އެންމެ ދޮށީ ބޭފުޅާ އެވެ. ދޮންބަންޑާރައިންނަކީ ޝައިހް މޫސާ ޖަމީލުދީދީގެ ފަސް ވަނަ ކާފާފުޅެވެ.