19 ވަނަ ރައްޔިތުންގެ މަޖިލީހުން ބަލައިނުގަނެ ބޭރުކޮށްލުމުން 20 ވަނަ މަޖިލީހަށް ހުށަހެޅި ސޮވްރިން ޑިވެލޮޕްމަންޓް ފަންޑުގެ ބިލުގެ ބަހުސް ފަށައިފިއެވެ.
20 ވަނަ ރައްޔިތުންގެ މަޖިލީހަށް ސަރުކާރުގެ ފަރާތުން މި ބިލު ހުށަހަޅާފައިވަނީ ފުވައްމުލަކު މެދު ދާއިރާގެ މެންބަރު އަލީ ފަޒާދުއެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި ބިލުގެ ބަހުސް ފަށާފައެވެ.
ސަރުކާރުގެ ފަރާތުން މި ބިލު ހުށަހެޅުމުގެ ބޭނުމެއްގެ ގޮތުން ބުނެފައިވަނީ، ދައުލަތުގެ ދަރަނި ކުޑަކޮށް ދައުލަތުގެ މުއްސަނދިކަން އަންނަންއޮތް ޖީލުތަކަށް ވާރުތަކޮށްދިނުމަށްޓަކައި ސޮވްރިން ޑިވެލޮޕްމަންޓް ފަންޑެއް ގާއިމުކޮށް، އެ ފަންޑު ހިންގައި ބެލެހެއްޓުމާއި ފަންޑުގެ ފައިސާ ބޭނުންކުރުމާގުޅޭ އުސޫލުތަކާއި އެނޫންވެސް ކަމާބެހޭ އުސޫލުތައް ބަޔާން ކުރުން ކަމަށެވެ.
މި ބިލު 19 ވަނަ މަޖިލީހުން ބަލައިނުގަނެ ބޭރުކޮށްލީ، މެންބަރުންގެ ވޯޓު އެއްވަރުވުމުން އެމްޑީޕީ މެޖޯރިޓީ މަޖިލީހުގެ ރިޔާސަތުން ބިލު ބޭރުކުރުމަށް ވޯޓު ދިނުމުންނެވެ.