ކަސްޓަމްސްގެ ބެލުމުގެ ދަށުގައި ހުރި 8 ލައްކައަށް ވުރެ ގިނަ ސިނގިރޭޓު ނައްތާލައިފި އެވެ.
ކަސްޓަމްސް އިން ބުނީ ގަވައިދާ ހިލާފަށް ރާއްޖެ އެތެރެ ކުރަން އުޅެނިކޮށް ކަސްޓަމްސް އިން ހިފަހައްޓާފައިވާ ތަކެތި މި މަހުގެ 4 ވަނަ ދުވަހު ނައްތާލާފައިވާ ކަމަށެވެ. އޭގެ ތެރޭގައި 867،410 ސިނގިރޭޓު ހިމެނޭ ކަމަށް ކަސްޓަމްސް އިން ވަނީ ބުުނެފަ އެވެ.
ސިނގިރޭޓުގެ އިތުރުންވެސް ގަވައިދާ ހިލާފަށް ރާއްޖެ އެތެރެ ކުރަން ގިނަ އަދަދެއްގެ ތަކެތި ވަނީ ނައްތާލާފަ އެވެ. އޭގެ ތެރޭގައި:
– 3496 ބަނގުރާ ފުޅި
– 763 ބިއަރު ދަޅު
– 32 ބަނގުރާ އެކުލެވޭ އެހެނިހެން ތަކެތި (ޕްލާސްޓިކް، ޗޮކްލެޓް، ޕެކެޓް)
– 162.58 ދުންފަތް / ދުންބޯ ފަތް (ކިލޯ)
– 137 ސިންގަލް ޔޫސް ޕްލާސްޓިކް ކޮތަޅު
– 43 ސިންގަލް ޔޫސް ޕްލާސްޓިކް ތަށި، ފުޅި، ހޮޅި
ރާއްޖެ އަންނަ ފަތުރުވެރިންނާއި، ބިދޭސީން އަތުން ގާނޫނާއި ހިލާފަށް ރާއްޖެ އެތެރެކުރާ ތަކެތި ފެންނައިރު، ކަސްޓަމްސްއިން ދަނީ އެތަކެތި އަތުލައި، ގާނޫނާ އެއްގޮތްވާ އުސޫލްތަކުގެ މަތިން އެ ތަކެތި ނައްތާލަމުންނެވެ.