މާފުށީ ޖަލުގައި ތިބި ގައިދީންނަށް ފޯނާއި މަސްތުވާތަކެތި ހޯދައިދީ، ނަހަމަ ގޮތުގައި އެތައް ފައިސާއެއް ހޯދި މައްސަލާގައި ހައްޔަރުކުރި ކަރެކްޝަނުގެ އޮފިސަރުންގެ ތެރެއިން އެކަކު ބަންދުން ދޫކޮށްލައިފި އެވެ.
ހައިކޯޓުން މިނިވަންކޮށްފައިވަނީ ކ. މާފުށީ މާވިނަ، ޒަޔާން އަހްމަދު އެވެ. ޒަޔާން ބަންދުން ދޫކޮށްލީ އޭނާ ބަންދު ކުރަން ކުރިމިނަލް ކޯޓުން އަމުރުކުރީ ގޯސްކޮށް ކަމަށް ބުނެ ކުރިމިނަލް ކޯޓުގެ އަމުރު ހައިކޯޓުގައި އިސްތިއުނާފް ކުރުމުންނެވެ.
ޖަލަށް ފޯނާއި ޑްރަގްސް ވެއްދި މައްސަލާގައި އޮފިސަރުންތަކެއް ހައްޔަރުކުރީ މިދިޔަ ޖޫން މަހުގެ 28ގައި ކަމަށްވާއިރު، މީގެތެރޭގައި 13 މީހަކު ހިމެނެ އެވެ. މީގެތެރެއިން ފަސް މީހެއްގެ މައްޗަށް ވަނީ ދައުވާ އުފުލާފަ އެވެ. އެ އޮފިސަރުންނަކީ:
1. ޖިނާޙް އަބްދުއްރަޙީމް، ރ. އުނގޫފާރު، އައިވަރީހައުސް
2. އަލީ ހިޝާމް، ކ. މާފުށި، ބީޗްހައުސް،
3. އަލީ ނާޒިމް، ހދ. ނޭކުރެންދޫ، ތަރާނާގެ
4. މުހައްމަދު ފަތޫހު ފަތުހުﷲ، ގއ. ވިލިނގިލި، ކުއްޅަވައްގެ
5. އަލީ އަސްފާގް، ނ. ލަންދޫ، ކާމިނީގެ
މީގެ ތެރެއިން ޖިނާޙް އަބްދުއްރަހީމާއި އަލީ ހިޝާމްގެ މައްޗަށް ވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އާއި މަނީ ލޯންޑަރިން ކުށުގެ ދައުވާއާއި ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާ އުފުލާފަ އެވެ.
ދެން ތިބި ތިން މީހުންގެ މައްޗަށް އުފުލާފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އާއި ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާ އެވެ.
ޕީޖީ އޮފީހުން ބުނީ މި މައްސަލައިގައި ތުހުމަތުކުރެވޭ އިތުރު މީހުންގެ މައްޗަށް ދަޢުވާކުރެވޭ މިންވަރަށް މިވަގުތު ހެކި ޤާރީނާ ލިބިފައިނުވާތީ، މިވަގުތަށް ދަޢުވާ ނުކުރުމަށް ނިންމާފައިވާ ކަމަށެވެ. މި މައްސަލައިގެ ތަޙުޤީޤު އަދިވެސް ކުރިއަށްދާތީ، އިތުރު ބައިތަކުގެ ތަޙުޤީޤު ނިމުމުން، ތުހުމަތުކުރެވޭ އިތުރު މީހުންގެ މައްޗަށް ދަޢުވާކުރުމާމެދު ގޮތެއް ނިންމާނެ ކަމަށް ޕީޖީ އޮފީހުން މައުލޫމާތުދެ އެވެ.