މި ސަރުކާރު ވެރިކަމަށް އައި ފަހުން މިހާތަނަށް 183 ކިލޯގެ މަސްތުވާތަކެތި އަތުލައިގެންފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
ސަރުކާރަށް އެއް އަހަރު ފުރުމާ ދިމާކޮށް ދައުލަތުގެ މީޑިއާ އިން ގެނެސްދިން ޕްރޮގްރާމެއްގައި ވާހަކަދައްކަމުން އިހުސާން ވިދާޅުވީ މިދިޔަ އެއް އަހަރުތެރޭ 183 ކިލޯގެ ޑްރަގްސް އަތުލައިގެންފައިވާ ކަމަށާއި އެއީ 333 މިލިއަން ރުފިޔާގެ ޑްރަގްސް ކަމަށެވެ.
ޖަލު ތެރޭގައި ސްކޭމް ކޯލުކުރުމާއި މަސްތުވާތަކެތި ބޭނުންކުރުން ހުއްޓުވުމަށް ޚާއްސަ އޮޕަރޭޝަނެއް ހިންގިފައިވާ ކަމަށާއި އެ އޮޕަރޭޝަނުގެ ތެރެއިން ޖަލު ބަލަހައްޓާ ބައެއް އޮފިސަރުން މިކަމުގައި ހިމެނޭކަން ފާހަގަކުރެވުނު ކަމަށް އިހުސާން ވިދާޅުވި އެވެ.
"ވަރަށް ޖެހިލުން ކުޑަ ނިންމެވުމެއް ރައީސް ނިންމެވީ. ވަކި މީހެއްގެ މޫނަކަށް ކަނދުރާއަކަށް ނުބައްލަވާ، ދައުލަތުގެ އިދާރާތަކުގައި ހުންނަންޖެހޭނީ ވަކި މިންގަނޑެއްކަން، ގަބޫލުކުރާނީ ޓޮލަރޭޓްކުރާނީ ވަކި ލެވެލްއެއްގެ ސާވިސްއެއްކަން. އެހިސާބުން އެސްޓަބްލިޝް ކުރެވޭ މީހުންނަށް ވަނީ ފިޔަވަޅު އެޅިފައި،" އިހުސާނު ވިދާޅުވި އެވެ.
އަދި ޖަލުތަކުން ސްކޭމް ކޯލްތައް ކުރަމުންދާ މީހުންގެ އަތުން ފޯނުތައް އަތުލައި ޖަލުތައް އިތުރަށް ހަރުދަނާ ކުރުމަށް މަސައްކަތް ކުރަމުން އަންނަ ކަމަށްވެސް އޭނާ ވިދާޅުވި އެވެ.
މީގެއިތުރުން ގޭންގު ކުށްތަކާއި މަސްތުވާތަކެތީގެ މައްސަލަ އަށް ދާއިމީ ހައްލެއް ހޯދުމަށް މިހާރު ހެދިފައި ހުރި ގާނޫނުތަކުގައި ހުރި މައްސަލަތައް ދެނެގަނެ، މައްސަލަތައް ހައްލުކޮށް އެއަށް ބޭނުންވާ ބިލް ޑްރާފްޓް ކުރުމަށްފަހު އެޓާނީ ޖެނެރަލްގެ އޮފީހަށް ފޮނުވާފައިވާ ކަމަށް އިހުސާން ވިދާޅުވި އެވެ.
މި ބިލުތަކާއެކު ސަރުކާރުން ކުރަމުންދާ މަސައްކަތްތަކުގެ ފުރިހަމަ ނަތީޖާ ފެންނަން ފަށާނެ ކަމަށްވެސް އޭނާ ވިދާޅުވި އެވެ.