ފާއިތުވި އެއް އަހަރުތެރޭ 50 ފުލުހަކަށް ފިޔަވަޅު އަޅައި، 20 ފުލުހަކު ވަޒީފާ އިން ވަކިކޮށްފައިވާ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެ އެވެ.
ދައުލަތުގެ މީޑިއާގައި ވާހަކަދައްކަމުން ސީޕީ ޝުޖާއު ވިދާޅުވީ އެއްވެސް ކަހަލަ ނުފޫޒެއް އަދި އެހެން ކަހަލަ ކުށްތަކުން އެއްކިބާވެފައި ތިބި ބަޔަކަށް ފުލުހުން ހެދުމަށް މަސައްކަތްތަކެއް ކުރެވެމުންދާ ކަމަށާއި އަދި އެފަދަ ކަންކަން ކުރާ ފަރާތްތަކަށް ފުލުހުންގެ ތެރޭގައި އޮންނަ ނިޒާމުގެ ތެރެއިން ފިޔަވަޅު އަޅާ ކަމަށެވެ.
އެގޮތުން މިއަހަރުތެރޭ ފުލުހުންނާއި ގުޅޭގޮތުން ހުށަހެޅުނު ޝަކުވާތައް ބަލައި 50 އަށް ވުރެ ގިނަ ފުލުހުންނަށް ފިޔަވަޅު އަޅައި 20 ފުލުހަކު ވަޒީފާއިން ވަކިކޮށްފައިވާ ކަމަށް ސީޕީ ވިދާޅުވި އެވެ.
"އެއްވެސް ފުލުހަކު އެ އޮންނަ އުސޫލުތަކާ ހިލާފަށް މަސައްކަތް ކުރާނަމަ އެ ފުލުހަކާ ދޭތެރޭ ފިޔަވަޅު އެޅޭނެ،" ސީޕީ ވިދާޅުވި އެވެ.
ފުލުހުންގެ މަސައްކަތަށް ފާރަވެރިވާނެ ދެ މުއައްސަސާއެއް އެބައޮތްކަން ފާހަގަކުރައްވަމުން ސީޕީ ވަނީ އެ މުއައްސަސާތަކުން ހިންގާ ތަހުގީގުތަކަށް ވެސް ފުލުހުން ފުރިހަމަ އަށް އެއްބާރުލުން ދެމުންދާ ކަމަށް ވިދާޅުވެފަ އެވެ. އަދި ފުލުހުންނަކީ އެއްވެސް ނުފޫޒަކަށް ބޯލަނބައި އަދި އެއްވެސް ނުފޫޒެއްގެ ދަށުވެގެން މަސައްކަތް ކުރާ ގޮތަށް ފަރުމާކުރެވިފައި އޮތް މުއައްސަސާއެއް ނޫން ކަމަށްވެސް ސީޕީ ވިދާޅުވި އެވެ.