ޔޫރަޕިއަން ޔޫނިއަން (އީޔޫ) އާއި އދ. ފަދަ ޖަމިއްޔާތަކުން ނެރޭ ބަޔާންތަކަކީ ވަކި ސިޔާސީ ބަޔަކު ބުނެގެން ނެރޭ އެއްޗެއް ނޫންކަމަށް ހިތަދޫ ދެކުނު ދާއިރާގެ މެންބަރު އަލީ ނިޒާރު ވިދާޅުވެއްޖެއެވެ.
ނިޒާރު މިހެން ވިދާޅުވެފައި މިވަނީ، ދިވެހި ކޮންމެ ރައްޔިތަކީ އިސްލާމް ދީން ގަބޫލުކޮށްގެން ހުރި މުސްލިމަކަށް ވާން ނުޖެހޭ ގޮތަށް ގާނޫނު ބަދަލުކުރުމަށް އީޔޫ އިން ދިވެހި ސަރުކާރަށް ހުށަހަޅާފައިވާ ދަނޑިވަޅެއްގައެވެ.
ނިޒާރު ވިދާޅުވި ގޮތުގައި އީޔޫ އާއި ޔޫއެން އިން ނެރޭ ބަޔާންތަކަކީ އެމީހުންގެ އަމިއްލަ ވިސްނުން ކަމަށެވެ.
މީގެ އިތުރުން އީޔޫ އިން ނެރުނު ބަޔާނުގައި ސަރުކާރުން ވައްކަމާއި އަނިޔާ ނުކުރުމަށް ބުނެފައި ނުވޭތޯ ނިޒާރު ވަނީ ސުވާލު ކުރައްވާފައެވެ. ނިޒާރު ވިދާޅުވީ، އިސްލާމްދީނުގައި ވެސް އެކަން އޮތީ އެހެން (އީޔޫގެ ބަޔާނުގައި އޮތް ގޮތަށް) ކަމަށެވެ.
EU in ves adhi UN in ves nerey Bayaan thakakee Vaki Siyaasee bayaku bunegen nerey echei noon. Ei emeehunge Amilla Visnun. Sarukaarun Vakkamaai Aniyaa Nukuran e bayaathaku Nuveytho? Islaam Dheenuga ves ekan othee ehen. Sarukaarun e vaahaka adu ehi tho?
— Ali Nizar (@DhekunuNizar) April 19, 2018
ނިޒާރު މިހެން ވިދާޅުވެފައިވަނީ އީޔޫއިން މިއަދު ހުށައެޅި ގަރާރަކީ ދިވެހި ރާއްޖޭގައި ތަފާތު ދީންތަކަށް ފުރުސަތު ދިނުމަށް އިދިކޮޅުން ކުރުވި ކަމެއް ކަމަށް ބުނެ ޕީޕީއެމުން ތުހުމަތުކުރަމުންދާ ދަނޑިވަޅެއްގައެވެ.
ޕީޕީއެމުން ބުނެފައިވަނީ އީޔޫ އިން ބޭނުންވާ ގޮތަށް ހެދުމުގެ ފުރުސަތެއް ނެތް ކަމަށެވެ. އަދި މިރާއްޖޭގައި އިސްލާމް ދީން ނޫން އެހެން ދީނެއް ގެނައުމަށް ކުރާ މަސައްކަތް ކާމިޔާބު ވާނީ އެބޭފުޅުން މަރާލުމަށްފަހުގައި ކަމަށް ވެސް ޕާޓީގެ އިސް ބައެއް ބޭފުޅުން ވަނީ ވިދާޅުވެފައެވެ.