އުމުރުން 16 އަހަރުގައި ބާސާގެ ފުރަތަމަ ޓީމަށް ކުޅެން ފެށި އަންދްރޭސް އިނިއެސްޓާ 17 އަހަރަށް ފަހު ކުލަބު ދޫކޮށް ދިއުމަށް ނިންމައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އިނިއެސްޓާ ބުނެފައިވަނީ ކުޅެން ފެށިއިރު އޭނާގެ ހަމައެކަނި އަމާޒަކަށް ވީ ބާސާގައި ކާމިޔާބު އަހަރުތަކެއް ހޭދަކުރުން ކަމަށެވެ. އަދި އެ ލަނޑުދަނޑި ހާސިލު ވެއްޖެ ކަމަށާއި އެހެންކަމުން ކުލަބު ދޫކޮށް ދިއުމަށް ގަސްދުކޮށްފައިވާ ކަމަށް 33 އަހަރުގެ ބާސާ ކެޕްޓަން ބުނެފައިވެއެވެ.
😭 When a legend says goodbye…#Infinit8Iniesta pic.twitter.com/bNw5eLEXyh
— FC Barcelona (@FCBarcelona) April 27, 2018
ބާސާގައި ހޭދަކުރި 17 އަހަރު ތެރޭގައި އިނިއެސްޓާ ވަނީ އަށް ފަހަރު ލީގު ނަގާފައެވެ. އަދި ހަތަރު ޗެމްޕިއަންސް ލީގު ކާމިޔާބުކޮށްފައިވާ އިނިއެސްޓާ އަކީ ސްޕެއިނުން 2010 ވަނަ އަހަރު ވޯލްޑް ކަޕް ނެގިއިރު ފައިނަލް މެޗުގައި ގޯލު ޖެހި ކުޅުންތެރިޔާ ވެސްމެއެވެ.
ބާސާ އަށް ފަހު އިނިއެސްޓާ ދެން ކުޅޭނީ ޗައިނާ ލީގުގައި ކަމަށް އަޑު ފެތުރިފައިވެއެވެ. ނަމަވެސް އޭނާ ވަނީ އެކަމާ ގުޅޭ ގޮތުން އެއްވެސް އެއްޗެއް ހާމަކުރުމަށް ދެކޮޅު ހަދާފައެވެ. ނަމަވެސް އިނިއެސްޓާ ބުނެފައިވަނީ އޭނާ ދުވަހަކުވެސް ބާސާއާ ދެކޮޅަށް ނުކުޅޭނެ ކަމަށެވެ. އެހެންކަމުން ޔޫރަޕުގެ ކުލަބަކުން އިނިއެސްޓާ ފެނުމުގެ ފުރުސަތު ވަރަށް ކުޑައެވެ.