އެމްޑީޕީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ތޮއްޑޫ ދާއިރާގެ ކުރީގެ މެމްބަރު، އަލީ ވަޙީދު އެމްޑީޕީ ދޫކޮށް ޖުމުހޫރީ ޕާޓީއާ ގުޅިވަޑައިގަތުމަށް ނިންމައިފިއެވެ.
އަލީ ވަހީދު މިއަދު ކުރެއްވި ޓުވީޓެއްގައި ވިދާޅުވެފައިވަނީ އެމްޑީޕީގެ މެމްބަރުންނަށާއި ލީޑާޝިޕަށް އަދި ކުރީގެ ރައީސް މުހައްމަދު ނަޝީދަށް ޝުކުރު އަދާ ކުރައްވާ ކަމަށެވެ. ނަމަވެސް މިވަގުތު ޕާޓީ ދޫކޮށް ޖުމުހޫރީ ޕާޓީއާ ގުޅުމަށް ނިންމާފައިވާތީ ވަކިވެލީ ކަމަށް ވިދާޅުވިއެވެ.
Loabivaa @MDPSecretariat ge hurihaa aamu membarunnah hithuge ikhlaastheri shukuru dhannavan. Partyge Raees @MohamedNasheed adhi PG Leader @ibusolih ah abadhuves kaamiyaabah edhen. Alhugandu mivaguthu vakivelee. Ehenas alhugandumenge hithaa hithuge gulhumeh nufoheveyne! VTV 930pm! pic.twitter.com/cICxkenHiq
— Ali Waheed (@ali20waheed) May 26, 2018
މޭ 1، 2015 ގައި އިދިކޮޅު ފަރާތްތަކުން ބޭއްވި ބޮޑު އެއްވުމަށް ފަހު ޓެރަރިޒަމްގެ ދައުވާ އުފުލުމުން ގައުމުން ބޭރަށް ވަޑައިގެންނެވުމަށް ފަހު އަލީ ވަހީދު ވަނީ އަމިއްލައަށް ރާއްޖެއިން ބޭރަށް އަރުވާލެވިގެން، އިނގިރޭސި ވިލާތަށް ދިރިއުޅުން ބަދަލު ކުރައްވާފައެވެ.
އަދި އެމްޑީޕީގެ ޗެއާޕާސަންގެ މަގާމުން 2016 ވަނަ އަހަރު އިސްތިއުފާ ދެއްވިއެވެ. އޭނާ އޭރު ވިދާޅުވީ ޕާޓީގެ ހަރަކާތްތަކާއި މެމްބަރުންނާއި ދުރުގައި ހުންނަން ޖެހުމުން ޕާޓީއަށް ބޭނުންތެރި ލީޑަރަކާ ޕާޓީ ހަވާލުކުރުމަށް މަގާމުން އިސްތިއުފާ ދެއްވާ ކަމަށެވެ.
ރާއްޖެއިން ބޭރަށް ދިރިއުޅުން ބަދަލު ކުރެއްވި ނަމަވެސް އަލީ ވަހީދު ވަނީ ރައީސް ޔާމީނާއި އެމަނިކުފާނުގެ އަނބިކަނބަލުން ފަސްޓް ލޭޑީ، ފާތުމަތު އިބްރާހިމަށް ވަރަށް ބޮޑަށް ފާޑު ކިޔާފައެވެ. ބައެއް އިންޓަވިއުތަކުގައި އަލީ ވަހީދު ވަނީ ކޮރަޕްޝަނުގެ ބޮޑެތި މައްސަލަތަކާ ގުޅޭ ގޮތުން ވާހަކަ ދައްކައި ރައީސް ޔާމީނަށް ބޮޑެތި ތުހުމަތުތަކެއް އަމާޒުކޮށްފައެވެ.
ޑީއާރުޕީގައި އިސް ދައުރެއް އަދާ ކުރެއްވުމަށް ފަހު ރައީސް ނަޝީދުގެ ވެރިކަމުގައި އަލީ ވަހީދު ވަނީ ޕާޓީ ބަދަލުކުރައްވައި އެމްޑީޕީއާ ގުޅިވަޑައިގެންފައެވެ. އެމްޑީޕީގައި ވަރަށް އިސްކޮށް މަސައްކަތް ކުރެއްވުމަށް ފަހު އޭނާ ވަނީ މިދިޔަ އާންމު އިންތިޚާބުގައި އެމްޑީޕީގެ ޓިކެޓުގައި ވާދަވެސް ކުރައްވާފައެވެ. ނަމަވެސް އަލީ ވަހީދު ވަނީ އިންތިޚާބުން ބަލިވެފައެވެ.