މަޝްހޫރު ގާނޫނީ ވަކީލް ހުސްނުއް ސުއޫދު އެދޭ ވެރިކަމެއްގައި ރާއްޖޭގެ ސުޕުރީމް ކޯޓުގައި ކުރިއަށްދާ އާއްމު މަސްލަހަތާ ގުޅުން ހުރި މައްސަލަތަކުގެ އަޑުއެހުންތައް ޓީވީން ލައިވް ކުރާނެކަމަށް ވިދާޅުވެއްޖެ އެވެ.
ސުއޫދު އެދޭ ވެރިކަމެއްގައި އޮންނަން ފެންނަ ގިނަ ކަންތަކާއި ގުޅޭ ގޮތުން ސޯޝަލް މީޑިއާގައި ހިޔާލު ފާޅުކުރައްވަމުން އަންނަ އިރު މިއަދު ސުއޫދު ވިދާޅުވީ ޝަރީއަތް ކުރަން ޖެހޭނީ ހާމަކަމާއި އަދުލުވެރިކަމާއި އެކު ކަމަށެވެ.
#AhramenEdheyVerikamehgai Supreme Court gai hingaa sharee'ah thakaai aanmu maslahathaa gulhun huri massala thakuge adu ehunthah tv in live koh dhekkeyne. Sharee'ah kuranvaanee haama kamaai adhulu verikamaa eku.
— Husnu Al Suood (@hsuood) June 23, 2018
ސުއޫދު ވަނީ މީގެ ކުރިން އޭނާ އެދޭވެރިކަމެއް އަންނަތާ 90 ދުވަހުގެ ތެރޭގައި ޓެރަރިޒަމް ގާނޫނު އުވާލާނެކަމަށްވެސް ވިދާޅުވެފައެވެ. ސުއޫދު ވިދާޅުވީ ޓެރަރިޒަމްގެ ގާނޫނުގެ ބޭނުން ހިފަނީ ޓެރަރިޒަމްގެ އަމަލުތަކަކަށް ނޫން ކަމަށެވެ. އެ ގާނޫނުގެ ބޭނުން ހިފަނީ، ހަމައެކަނި ސިޔާސީ ހަތިޔާރެއްގެ ގޮތުގައި ކަމަށް އޭނާ ވިދާޅުވި އެވެ.
އޭނާ ވިދާޅުވި ގޮތުގައި އެ ގާނޫނު ނެތަސް، ޓެރަރިޒަމްގެ ކުށްތަކަށް އަދަބު ދޭން ގާނޫނުލްއުގޫބާތު ފުދެ އެވެ.
މީގެ އިތުރުންވެސް ސުއޫދު ވިދާޅުވީ "އަހަރެން އެދޭ ވެރިކަމެއްގައި" މީހުންގެ މުދަލާއި ވަސީލަތްތައް ވިއްކައި ކުއްޔަށް ދޭނީ އާއްމުކޮށް ހުޅުވާލެވޭ ބީލަމެއްގައި އެންމެންނަށް ފުރުސަތު ލިބޭ ގޮތަށް ކަމަށެވެ.
ރާއްޖޭގެ ޝަރީއަތްތައް މިހާރު ކުރިއަށްދާ ގޮތަށް ވަރަށް ބޮޑަށް ފާޑު ވިދާޅުވަމުން އަންނަ ސުއޫދުއަކީ ރާއްޖޭގެ ބަންޑާރަ ނައިބްކަން ކުރައްވާފައިވާ ބޭފުޅެކެވެ.