ރާއްޖޭގެ ވެރިރަށް މާލެ އާއި ވެލާނާ އިންޓަނޭޝަނަލް އެއާޕޯޓް (ވީއައިއޭ) ހިމެނޭ ހުޅުލެ ގުޅުވާލާ ބްރިޖު ކަމުގައިވާ ޗައިނާ މޯލްޑިވްސް ފްރެންޑްޝިޕް ބްރިޖް (ސީއެމްއެފްބީ) ގެ މަސައްކަތް ނިންމަން ކަނޑައަޅާފައިވަނީ އަންނަ ސެޕްޓެމްބަރު ގައި ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައިވަނީ މިއަދު ކުރެއްވި ޓްވީޓެއްގަ އެވެ.
CMFB nimman contract koffaivaa thaareekh akee September 25, 2018. Namaves masakkai eyahvure 2 masdhuvas avahah (July 26 ah) nimmumah contractor amilla isnegimakun masakkai kuraakamah vaanee dhannavaafa. September 25 ahvure avahah nimey komme dhuvahakee avasvumeh; lasvumennoon.
— Dr Mohamed Muizzu (@MMuizzu) July 3, 2018
އެ ޓްވީޓްގައި މިނިސްޓަރު ވިދާޅުވެފައި ވަނީ ސީއެމްއެފްބީ ނިންމަން ކޮންޓްރެކްޓް ކޮށްފައިވާ ތާރީޚަކީ އަންނަ ސެޕްޓެމްބަރު މަހުގެ 25 އަށް ކަމަށާއި، ނަމަވެސް މަސައްކަތް އެއަށްވުރެ ދެ މަސްދުވަސް އަވަހަށް (ޖުލައި 26) ނިންމުމަށް ކޮންޓްރެކްޓަރ އަމިއްލަ އިސްނެގުމަކުން މަސައްކަތް ކުރަމުން އަންނަ ކަމަށެވެ.
"ސެޕްޓެމްބަރު 25 އަށް ވުރެ އަވަހަށް ނިމޭ ކޮންމެ ދުވަހަކީ އަވަސްވުމެއް، ލަސްވުމެއް ނޫން" މިނިސްޓަރު ވިދާޅުވިއެވެ.
މާލެ ހުޅުލެ ބްރިޖްގެ މަޝްރޫއަށް 220 މިލިއަން އެމެރިކާ ޑޮލަރު ހަރަދުވާއިރު ބްރިޖްގެ ދިގުމިނުގައި 1.39 ކިލޯމީޓަރު އަދި ފުޅާ މިނުގައި، 20.3 މީޓަރު ހުރެއެވެ. ބްރިޖްގައި ހަތަރު ފުރޮޅުލީ ވެހިކަލް ދުއްވާ ދެ ލޭން އާއި، ސައިކަލްތަކަށް ވަކި ލޭން އަކާއި، ބައިސްކަލުގައި އަދި ހިނގާފައި އުޅޭ ފަރާތްތަކަށް ވަކި ލޭންއެއް ހިމެނެއެވެ.
މާލެ އާއި ހުޅުލެއާއި ދެމެދު ބްރިޖެއް އެޅުމަކީ، ރައީސް އަބްދުﷲ ޔާމީންގެ ރިޔާސީ ވައުދެކެވެ.