ރައީސް ޔާމީން މިމަހުގެ ކުރީކޮޅު ގދ. ގައްދޫއަށް ވަޑައިގަތްއިރު، އެމަނިކުފާނަށް މަރްހަބާ ދެންނެވުމަށް ގައްދޫ ބަނދަރު ސަރަހައްދުގައި ހެދި މަރިޔާދުގޭގައި ރޭ ހުޅުޖެހި މައްސަލައިގެ ތުހުމަތުގައި މީހަކު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލު ވިދާޅުވީ އެ މައްސަލައާއި ގުޅިގެން ގައްދޫއިން އުމުރުން 41 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ. ނަމަވެސް އޭނާގެ ނަމެއް ފުލުހުން ހާމައެއް ނުކުރެއެވެ.
ލަކުޑި އާއި ފަނުން، އުނދޯއްޔަކާ އެކު ޕީޕީއެމްގެ ސަޕޯޓަރުން ހަދާފައިވާ މަރިޔާދުގޭގައި ރޯވެފައި ހުއްޓައި ފެނިގެން އެކަން ފުލުހުންނަށް ރިޕޯޓް ކޮށްފައިވަނީ ރޭ 22:45 ހާއިރު ކަމަށް ފުލުހުން ބުނެއެވެ.
މަރިޔާދުގޭގައި ބަޔަކު ގަސްތުގައި އަލިފާން ރޯކޮށްލީކަމެއް ނުވަތަ މިއީ އެނޫންގޮތަކަށް ހިނގި ހާދިސާއެއް ކަމާމެދު ފުލުހުން އަދި އެއްވެސް އެއްޗެއް ނުބުނެއެވެ.
އެހެންނަމަވެސް ޕީޕީއެމުން ތުހުމަތު ކުރަނީ މަރިޔާދުގޭގައި ބަޔަކު ހުޅުޖެހީ ކަމަށެވެ.
މި ހާދިސާ ހިނގުމާއި ގުޅިގެން ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު ކުރެއްވި ޓްވީޓެއްގައި ވިދާޅުވެފައި ވަނީ މިފަދަ ހާދިސާއެއް ހިނގައިދިއުމަކީ އިންތިހާއަށް ހިތާމަކުރައްވާ ކަމެއް ކަމަށެވެ.
#Yameen ah maruhabaa dhennevumah hedhi #Gadhdhoo Mariyaadhu ge andhaa hulivejje.
Mifadha haadhisaa'eh hingai dhiumakee inthihaa ah hithaama kuraakameh. Gasthuga bayaku raavaigen hingi jareemaa akah vaanama harukashi koh kuvveri kuran. pic.twitter.com/TSKbKkJiUL
— Mohamed Ameeth (@MohamedAmeeth) August 20, 2018
"ގަސްތުގައި ބަޔަކު ރާވައިގެން ހިންގި ޖަރީމާއަކަށް ވާނަމަ ހަރުކަށިކޮށް ކުށްވެރިކުރަން"، އަމީތު ވިދާޅުވި އެވެ.