ރައީސް އަބްދުﷲ ޔާމީން ގެނެސްދެއްވި ތަރައްގީ ރައްޔިތުން ބަލައިގަންނަނަމަ އެމަނިކުފާނަށް އިތުރު ދައުރެއް ދެއްވުމަށް ހައުސިން މިނިސްޓަރ ޑރ. މުހައްމަދު މުއިއްޒު ރައްޔިތުންނަށް ގޮވާލައިފިއެވެ.
ހދ. ނޮޅިވަރަންފަރު ރައްޔިތުންނާ ބައްދަލުކުރައްވައި މުއިއްޒު ދެއްކެވި ވާހަކަފުޅުގައި ވިދާޅުވެފައިވަނީ ރައީސް ޔާމީންގެ ފުރަތަމަ ދައުރު ހަމަވާން ކައިރިވެފައިވާއިރު އެމަނިކުފާނު ވަނީ ތަރައްގީ ގެނައުމަށް ގިނަގުނަ މަސައްކަތްތައް ކޮށްދެއްވާފައި ކަމަށެވެ.
އަދި ބަނދަރު ހެދުމަކީ ތަރައްގީގެ މަޝްރޫއުތަކުގެ ތެރެއިން މި ސަރުކާރުން ވަރަށް ޚާއްސަ އިސްކަމެއް ދީގެން ހިންގާ މަސައްކަތެއް ކަމަށާއި ރާއްޖޭގެ އެކި ކަންކޮޅުތަކުގައި 70 ބަނދަރު ސަރުކާރުން އަޅާ ދީފައިވާ ކަމަށް މިނިސްޓަރު ވިދާޅުވިއެވެ.
މަރާމާތުގެ މަސައްކަތްތައް ހިމަނައިފިނަމަ އެ އަދަދު 108 އަށް އިތުރުވާނެ ކަމަށާއި މިއީ ބަނދަރުގެ މަސައްކަތް އެންމެ ދައުރެއްގައި މިހާ ގިނަ އަދަދަކަށް ކުރެވުނު ފުރަތަމަ ފަހަރު ކަމަށް މުއިއްޒު ވިދާޅުވެފައިވެއެވެ.
ކުޅުދުއްފުށި ބިން ހިއްކުމަށް ފަހު އެއާޕޯޓު އެޅުމުގެ މަސައްކަތް ކުރިއަށްދާއިރު ސަރުކާރުން ވަނީ އިންތިޚާބުގެ ކުރިން އެއާޕޯޓުގެ މަސައްކަތް ނިންމުމަށް މަސައްކަތް ކުރަމުންނެވެ.