ރައްޔިތުންގެ ބައިތުލްމާލުން މި ސަރުކާރުން ކުރަމުންދާ އިސްރާފު ހުއްޓުވާނެ ކަމަށް ގުޅިފައިވާ އިދިކޮޅު ސިޔާސީ ޕާޓީތަކުގެ ރަނިން މޭޓް ފައިސަލް ނަސީމް ވިދާޅުވެއްޖެ އެވެ.
ފައިސަލް މިހެން ވިދާޅުވީ ބ. އަތޮޅަށް ކުރައްވާ ކެމްޕެއިން ދަތުރުފުޅުގައި އެ އަތޮޅު ކަމަދޫ އަށް ވަޑައިގެން މިއަދު އެ ރަށުގެ ރައްޔިތުންނާއި ބައްދަލުކުރައްވައި ވާހަކަދައްކަވަމުންނެވެ.
އެގޮތުން ފައިސަލް ވިދާޅުވީ ރައްޔިތުންގެ ފައިސާއިން ހިންގަމުންދާ ކޮރަޕްޝަންގެ ކަންކަމަށް ނިމުމެއް ނެތްކަމަށާއި، އިސްރާފު އިންތިހާއަށް ކުރަމުންދާކަމަށެވެ.
އެހެންނަމަވެސް، އިއްތިހާދުގެ ސަރުކާރެއްގައި އެފަދަ ކަންކަމަށް ބަލާނެ ކަމަށާއި ރާއްޖޭގެ ރަށްރަށް ތަރައްޤީވެ ރައްޔިތުން ބޭނުންވާ ކަންކަން ވެގެންދާނީ، އެބާވަތުގެ ބޭކާރު ޚަރަދުތައް ހުއްޓުވިގެން ކަމަށްވެސް ފައިސަލް ވިދާޅުވި އެވެ.
ފައިސަލް އިތުރަށް ވިދާޅުވީ އިއްތިހާދުގެ ސަރުކާރެއްގައި ރައްޔިތުންނަށް ތަރަށްޤީ ގެނެސްދޭނީ ދެފުއްފެންނަ އަދި ކޮރަޕްޝަނާއި އިސްރާފުން ދުރުވެ ތިބެކަމަށެވެ.
ފައިސަލް ވަނީ ބ. އަތޮޅަށް ކުރެއްވި ދަތުރުފުޅުގައި 9 ރަށަކަށް ވަޑައިގެން، އެ އަތޮޅު ކިހާދޫއިން ނިންމަވާލައްވާފައެވެ.