މިިދިޔަ އާދިއްތަ ދުވަހު ރާއްޖޭގައި ބޭއްވި ރިޔާސީ އިންތިޚާބު ބާތިލްކުރުމަށްޓަކައި މަސައްކަތް ކުރަމުން ގެންދާ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހުލޫފް ވިދާޅުވެއްޖެ އެވެ.
މަހުލޫފް މިހެން ވިދާޅުވެފައި ވަނީ ދާދި ދެންމެއަކު ކުރެއްވި ޓްވީޓެއްގަ އެވެ.
Receiving credible reports that President Yameen’s legal affairs Minister Azima Shukoor is currently in the High Court trying to unlawfully annul Sunday’s election results.
— Ahmed Mahloof (@AhmedMahloof) September 26, 2018
އެ ޓްވީޓްގައި މަހުލޫފް ވިދާޅުވެފައި ވަނީ ޤާނޫނާއި ޚިލާފަށް އާދިއްތަ ދުވަހުގެ ރިޔާސީ އިންތިޚާބުގެ ނަތީޖާ ބާތިލްކުރުމަށް ރައީސް އޮފީހުގެ ލީގަލް އެފެއާޒް މިނިސްޓަރ އާޒިމާ ޝުކޫރު މިވަގުތު ހައި ކޯޓަށް ވަޑައިގެން އުޅުއްވާ ކަމުގެ މަޢުލޫމާތު ވަރަށް އިތުބާރުހުރި ފަރާތްތަކުން ލިބެމުން އަންނަ ކަމަށެވެ.
މީގެ އިތުރުން މަހުލޫފް ކުރެއްވި އެހެން ޓްވީޓެއްގައި ވިދާޅުވެފައި ވަނީ މި އިންތިޚާބު ބާތިލްކޮށްގެން، އިންތިޚާބު ވަގަށް ނެގުމުގެ ފުރުސަތު ރައީސް ޔާމީން އާއި އެމަނިކުފާނުގެ ބައިވެރިންނަށް، ދިވެހި ރައްޔިތުން ނުދޭނެ ކަމަށެވެ.
The Maldivian people have suffered enough. We are not going to let Yameen and his cronies steal this election by annulling it. We will expose them and prosecute them. This is the time for people power.
— Ahmed Mahloof (@AhmedMahloof) September 26, 2018
އަދި އެފަދަ ޢަމަލެއް ހިންގަން އުޅޭ މީހުން ޤާނޫނުގެ ކުރިމައްޗަށް ގެނެސް، ޝަރީޢަތް ހިންގައި އަދަބު ދޭން ޖެހޭނެ ކަމަށް ވެސް މަހުލޫފް ވިދާޅުވި އެވެ.
މީގެ އިތުރުން މަހުލޫފް ވިދާޅުވީ މިއީ ރައްޔިތުންގެ ބާރު ދައްކަން ޖެހޭ ވަގުތު ކަމަށެވެ.
މިއަދު ހެނދުނު މަހުލޫފް ކުރެއްވި ޓްވީޓެއްގައި ވިދާޅުވެފައިވަނީ ރީތިކޮށް، ސުލްހަވެރިކޮށް ކަންކަން ގެންދަން އެބޭފުޅުން މަސައްކަތް ކުރި ނަމަވެސް ރައީސް ހުންނެވީ މަސްލަހަތު ގެއްލުވާލާ ގޮތަށް ކަމަށެވެ. އަދި އިންތިޚާބު ބާތިލުކުރުމަށް ރާވަމުންދާ ކަމަށް ވެސް މަހްލޫފް ވިދާޅުވެފައިވެއެވެ.
ދިވެހި ރައްޔިތުންގެ ނިންމުން ގަޑުބަޑުކޮށްލުމަށް ފުލުހުންނާއި ސިފައިން، އިލެކްޝަންސް ކޮމިޝަން އަދި ސުޕްރީމް ކޯޓުން ފުރުސަތު ނުދިނުމަށް ވެސް މަހްލޫފް ވަނީ ގޮވާލާފައެވެ.
އިންތިޚާބު ކާމިޔާބު ކުރެއްވި އިބޫ ސޯލިހް ވަނީ ރައީސް ޔާމީނާއި އެކު ބޭއްވުނު ބައްދަލުވުމުގައި ރައްޔިތުން ބަސް އިއްވައިފި ކަމަށާއި ބަލި ގަބޫލުކުރައްވައިފި ކަމަށް ވިދާޅުވި ކަމަށް މަޖިލިސް މެމްބަރުންނާ ބައްދަލުކޮށް ހާމަކުރައްވާފައެވެ. އިބޫ އިންތިޚާބު ކާމިޔާބު ކުރެއްވީ 34،000 ވަރަކަށް ވޯޓުގެ ތަފާތުންނެވެ.