އިންތިޚާބީ ރައީސް، އިބްރާހިމް މުހައްމަދު ސޯލިހު (އިބޫ) އަށް އަންނަ ނޮވެމްބަރު މަހުގެ 11 ވަނަ ދުވަހު ހުވާކުރެއްވޭނެ މަގުފަހިކޮށްދެއްވުމަށް ކުރީގެ ރައީސް، ޑރ. މުހައްމަދު ވަހީދު ގޮވާލައްވައިފި އެވެ.
11 ނޮވެމްބަރު 2013 ގައި ދައުރަށް ރައީސް އަބްދުﷲ ޔާމީން އަބްދުލް ޤައްޔޫމް ހޮވިވަޑައިގަތް ކަމަށް އެ އަހަރު އިލެކްޝަންސް ކޮމިޝަން އިން އިއުލާންކޮށްފައިވާ ކަމަށް ވިދާޅުވެ އީސީގެ ކުރީގެ ރައީސް ފުއާދު ތައުފީޤު ވަނީ އިއްޔެ ޓްވީޓް ކުރައްވާފަ އެވެ.
ފުއާދު ވަނީ އޭނާގެ ޓްވީޓްގައި 2013 ވަނަ އަހަރު އީސީ އިން ކުރި އެ އިއުލާނުގެ ކޮޕީއެއް ވެސް އެޓޭޗްކުރައްވާފަ އެވެ.
Considering this fact and the unavoidable circumstances under which elections got delayed few days in 2013, I urge HEP Yameen to find in his wisdom and generosity to hold swearing in of the President Elect Ibrahim Mohamed Solih on 11 Nov 2018, 50th Anniversary of the Republic.
— Mohamed Waheed (@DrWaheedH) September 27, 2018
ފުއާދުގެ އެ ޓްވީޓަށް ޖަވާބުދެއްވައި ރައީސް ވަހީދު ކުރެއްވި ޓްވީޓްގައި ވިދާޅުވެފައި ވަނީ އީސީގެ އެ އިއުލާނާއި އެއްގޮތްވާ ގޮތުގެ މަތިންނާއި 2013 ވަނަ އަހަރުގެ ރިޔާސީ އިންތިޚާބު ފަސްވީ ޙައްލެއް ނެތް ކަންތައްތަކެއް ދިމާވެގެން ކަމަށްވާތީ، މި އަހަރުގެ ނޮވެމްބަރު މަހުގެ 11 ވަނަ ދުވަހު އިބޫ އަށް ރައީސުލްޖުމްހޫރިއްޔާކަމުގެ ހުވާ ކުރެއްވުމުގެ ފުރުސަތު، ރައީސް ޔާމީންގެ ހެޔޮވިސްނުންފުޅާއި ދީލަތިފުޅުކަމުގެ ތެރެއިން ފަހިކޮށްދެއްވުމަށް އެދިވަޑައިގަންނަވާ ކަމަށެވެ.
އަދި ނޮވެމްބަރު 11 އަކީ ރާއްޖޭގެ 50 ވަނަ ޖުމްހޫރީ ދުވަސް ކަންވެސް އެމަނިކުފާނުގެ ޓްވީޓްގައި ވަނީ ފާހަގަކުރައްވާފައެވެ.
ރައީސް ވަހީދު މިހެން ގޮވާލެއްވިއިރު، ރިޔާސީ އިންތިޚާބު ބާއްވާ އަހަރުގެ ނޮވެމްބަރު މަހުގެ 11 ވަނަ ދުވަހުން ފެށިގެން އާ ރިޔާސީ ދައުރު ގުނަމުން އައި ނަމަވެސް، ރައީސް އަބްދުﷲ ޔާމީންގެ ފުރަތަމަ ރިޔާސީ ދައުރު ނިމޭނީ އަންނަ ނޮވެމްބަރު މަހުގެ 17 ގައި ކަމަށް އިލެކްޝަންސް ކޮމިޝަން (އީސީ) އިން ވަނީ ބުނެފަ އެވެ.
އެއީ 2013 ވަނަ އަހަރު ދެ ފަހަރަށް އިންތިޚާބު ފަސްކުރުމުގެ ސަބަބުން ރައީސް ޔާމީން ހުވާކުރެއްވީ އެ އަހަރުގެ ނޮވެމްބަރު މަހުގެ 17 ވަނަ ދުވަހު ކަމަށް ވާތީއެވެ.