ރާއްޖެ އަމާން ތަނަކަށް ހައްދަވައި ދެއްވާނެކަމަށް އިންތިހާބީ ރައީސް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެއެވެ.
14 އަހަރުގެ ކުއްޖަކު ވަޅިން ހަމަލާދީ ރޭ މަރާލާފައިވަނިކޮށް އިބޫ މިއަދު ކުރެއްވި ޓްވީޓެއްގައި ވިދާޅުވީ ރާއްޖޭގެ އެކި ސަރަހައްދު ތަކުގައި ނުރައްކާތެރި މާރާމާރީ އިތުރުވެ، ކުޑަކުދިން މާލެ މަގުމަތީ މަރާލުމުން ކަންކަން ފާލުން ނެއްޓިފައިވާ މިންވަރު ދައްކުވައިދޭ ކަމަށެވެ.
Raajjey ge eki sarahaddhu thakugai nurakkaatheri maaraamaary ithuruve, kudakudhin Male’ magu thakugai maraalumun kankan faalun netti, bossun laafavaa minvaru dhakkuvaidhey. Iraadha kureviyyaa alhugandumen ekuga massaikaiykoh Raajje akee amaan thanakah hadhaanan.
— Ibrahim Mohamed Solih (@ibusolih) October 11, 2018
"އިރާދަކުރެއްވިއްޔާ އަޅުގަނޑުމެން އެކުގައި މަސައްކަތްކޮށް ރާއްޖެއަކީ އަމާން ތަނަކަށް ހަދާނަން" އިބޫގެ ޓްވީޓުގައި ވިދާޅުވެފައިވެއެވެ.
މިދިޔަ ހޮނިހިރު ދުވަހުގެ ރެއިން ފެށިގެން މާލެ އާއި އައްޑޫގައި ތޫނު އެއްޗެހި ބޭނުންކޮށްގެން މާރާމާރީ ދަނީ ހިންގަމުންނެވެ. އެގޮތުން ދެމީހަކަށް ސީރިއަސް އަނިޔާތަކެއް ލިބުމާއި ގުޅިގެން އައިސީޔޫގައި ފަރުވާ ދެމުންދާ އިރު ރޭ ވަނީ 14 އަހަރުގެ ކުއްޖަކު މަރާލާފައެވެ.
ރާއްޖޭގައި މާރާމާރީ ހިންގައި ރައްޔިތުން ބޮޑު ބިރުވެރިކަމެއްގައި ތިއްބާ ކުށް މަދުކުރުމުގެ އޮޕަރޭޝަނެއް ފަށާފައިވާކަމަށް ފުލުހުން މިއަދު ވަނީ ބުނެފައެވެ.