ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމް އަކީ ޤައުމު ދޫކުރައްވައި ފިއްލަވާނެ ބޭފުޅެއް ނޫން ކަމަށް ސަރުކާރު ހިންގާ ޕާޓީ، ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.
އަދުރޭ މިހެން ވިދާޅުވެފައި ވަނީ މިއަދު ހަވީރު ކުރެއްވި ޓްވީޓެއްގަ އެވެ.
RY akee Gaumu dhookurahvaa fihlavaane beyfulheh noon. RY abadhuves masahkaiy kurahvaanee usoolu thakuge therein Gaumaa Rayyithun ge Hagguga.Qaanoonee imun beyrakah vada’eh nugannavaane. Is kurahvaanee dheenaa gaumiyyathu. Hunnavaanee Rayyithunnaa eku @VaguthuOnline @Ch13official
— Abdul Raheem Abdulla (@Banafsaa) October 17, 2018
އެ ޓްވީޓްގައި އަދުރޭ ވިދާޅުވެފައި ވަނީ ރައީސް ޔާމީން އަކީ ޤައުމު ދޫކުރައްވައި ފިއްލަވާނެ ބޭފުޅެއް ނޫން ކަަމަށާއި، އެމަނިކުފާނު އަބަދުވެސް މަސައްކަތް ކުރައްވަނީ އުސޫލްތަކުގެ ތެރެއިން ޤައުމާއި ރައްޔިތުންގެ ޙައްޤުގައި ކަމަށެވެ.
އަދި ރައީސް ޔާމީން ޤާނޫނީ އިމުން ބޭރަކަށް ވަޑައެއް ނުގަންނަވާނެ ކަމަށާއި، އެމަނިކުފާނު އިސްކުރައްވަނީ ދީނާއި ޤައުމިއްޔަތު ކަމަށްވެސް އަދުރޭ ވިދާޅުވި އެވެ.
މީގެ އިތުރުން އަދުރޭ ވިދާޅުވީ ރައީސް ޔާމީން އަބަދުވެސް ހުންނަވާނީ ދިވެހި ރައްޔިތުންނާއެކު ކަމަށެވެ.
އަދުރޭ މިހެން ވިދާޅުވެފައިވާއިރު، ރައީސް އަބްދުﷲ ޔާމީން ޤައުމު ދޫކޮށް ފުރާވަޑައިގަންނަވަން އުޅުއްވާ ކަމަށް އިދިކޮޅު ފަރާތްތަކުން ދަނީ ތުހުމަތުކުރަމުންނެވެ. އެގޮތުން ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހުލޫފް ވެސް މިއަދު ވިދާޅުވީ، އިންތިޚާބީ ރައީސް، އިބްރާހިމް މުހައްމަދު ސޯލިހު (އިބޫ) ހުވާކުރެއްވުމުގެ ކުރިން ރައީސް ޔާމީން ފުރާވަޑައިގަންނަވާނެ ކަމަށެވެ.
މިފަދަ އަޑުތަކެއް ފެތުރިފައިވާއިރު، ރައީސް ޔާމީންގެ އަނބިކަނބަލުން ފަސްޓް ލޭޑީ، މެޑަމް ފާތިމަތު އިބްރާހިމް ވަނީ މިމަހު ކުރީ ކޮޅު ސައުދީ އަރަބިއްޔާއަށް ފުރާވަޑައިގެންފަ އެވެ. އޭގެ ފަހުން އެކަމަނާ ރާއްޖެ ވަޑައިގެންފައެއް ނުވެ އެވެ.